Natu in 17 in Leidenstadt

S’era natu in 17 in Leidenstadt

Nantu à ruvine insanguinate

Seria statu un bravu o un peghju cristianu

S’era statu Allemanu

Di tante inghjulie è ignuranza a vita avvinta

È di rivincita nutrita

Seria statu ss’imprubabile cuscenza

Pientu à mezu à a surgente

S’era ingrandatu in i docklands in Belfast

Sullatu di fede o di casta

Averia avutu a forza à i mei oppostu

Di tradisce, apre una porta ?

S’era nata bianca è ricca in Johannesburg

Trà u pudere è a paura

Averia intesu ‘ssi mughji in lu ventu ?

Soffiu di cambiamentu

Ciò chè n’avemu in corpu ùn saperemu mai

Daretu à l’apparenze piatti

U stintu d’un vigliaccu o di un curagiosu

U peghju o u megliore

Seriamu i resistenti o muntoni di una banda

Sì a vita ci dumanda ?

S’era natu in 17 in Leidenstadt

Nantu à ruvine insanguinate

Seria statu un bravu o un peghju cristianu

S’era statu Allemanu

Finchè no campemu eiu è tù chè no siamu franchi

D’avè à sceglie un campu

19/06/2020

D’appressu à Né en 17 à Leidenstadt, parulle Jean-Jacques Goldman, Michael Jones

https://www.youtube.com/watch?v=UnSz5YYEc1Y

MANU

Manu entri ind’è tè

È asciuva ‘ssu pientu

Hà da chjode u caffè

È annerbi a ghjente

A to vesta in coghju

Ùn ti franca d’a pena

Ùn ne trovi appoghju

È fermi solu à cena

L’inchjostru d’e to bracce

A to cultella in stacca

Piattanu cusì male

‘ssu core chì si lagna

Manu datti rimenu

Ùn ti taglià e vene

Una zitella andata

Sò amichi turnati

Eramu accumpagnati

Tù solu cum’è un cane

Mughjavi i to peccati

L’ochji sempre à funtane

Ai scontru ‘ssa donna

Bella cum’è un sognu

Anghjulu o demoniu

À visu di Madonna

Ai fattu à a lesta

Per dalli u to core

Ma u soiu hè di petra

Chjosu ad ogni amore

Manu datti rimenu

A me mi faci pena

Una zitella andata

Sò amichi turnati

Noi chì simu lupi

Fatti per rundighjà

Una vita di coppiu

Ùn ci pò cuntentà

Dipoi tantu tempu

Simu figli è fieri

Tù cun ella sì sempre

Trà pena è addisperu

Manu a libertà

Hè spessu campà solu

Nè rilogiu à guardà

Nè basgiu troppu frollu

Manu datti rimenu

Odialla ùn vale a pena

Una zitella andata

Sò amichi turnati

Ùn ti tene più caru

Manu è tù a sai

Ùn pò truvà riparu

In bracce d’un appasciu

Quandu apri u to core

S’ella ti gira e spalle

Ricusendu u t’amore

Cum’è a vera farfalla

Dilli chì ti dispiace

Ti serai sbagliatu

Di strada o d’andatu

È truverai a pace

Manu datti rimenu

Ùn ti taglià e vene

Una zitella andata

Sò amichi turnati

Manu datti rimenu

Odialla ùn vale a pena

Una zitella andata

Sò amichi turnati

Manu datti rimenu

A me mi faci pena

Una zitella andata

Sò amichi turnati

Manu datti rimenu…

D’appressu à Manu, parulle Renaud Séchan.

16/06/2020

Cum’ellu a face spessu in e so canzoni Renaud parla di ellu à a terza persona.

Manu hè dunque ellu (Manuel hè u so terzu nome) ch’avia cunnisciutu à l’epica una pena di core.

https://www.youtube.com/watch?v=p_RIMOHKU70

https://www.youtube.com/watch?v=W76F3fNhmFQ

I bumbò

V’aghju purtatu ‘ssi bumbò

Chì i fiori morenu prestu

È sò cusì boni i bumbò

Bench’un fiore sia più bellu

Soprattuttu prontu à sbuccià

Ma v’aghju purtatu bumbò

Spergu chì anderemu à spassu

Chì a vostra mamma sterà bassa 

Guarderemu i treni passà

À ott’ore turnemu in casa

Chì bellu ghjornu di stagione

V’aghju purtatu ‘ssi bumbò

Sì vo sapessite a gioia

D’avè vi cun me a braccetta

Certi guardanu in catarochju

D’altri facenu e so risette

U mondu hè pienu di sgaiuffi

V’aghju purtatu ‘ssi bumbò

Sicura Anghjulina hè menu ricca

Hè menu bella a possu dì

È Anghjulina hè capellirossa

Crudela porta di prigiò

Custì avete a ragiò

V’aghju purtatu ‘ssi bumbò

Ed eccuci nantu à a Piazza

U chioschu sona Mozart

Ditemi serà un azardu

Di vede u vostru amicu Antò ?

Sì vo vulete mi ne vò

Avia purtatu ‘ssi bumbò

...

Ma bonghjornu o Anghjulina

V’aghju purtatu ‘ssi bumbò

Chì i fiori morenu prestu

È sò cusì boni i bumbò

Bench’un fiore sia più bellu…

05/05/2020

D’appressu à Les bonbons (parulle Jacques Brel)

https://www.youtube.com/watch?v=LWPl5hDjhoo

Storia d'un omu ingennu è versatile influenzevule da l'avisu di e donne.

Ricusatu da a prima donna di a canzone, volta versu Anghjulina ch'ellu avia purtantu criticatu cun 'ssa donna.

http://corse-cpa.over-blog.com/2016/07/02/bastia-place-st-nicolas-le-kiosque-et-le-cyrnos-palace-2/

Brama

à F.

Ùn fussi ch’una stonda

Pusà vicinu à tè

Fà di ogni seconda

Una stonda piacè

Ramintà lugliu scorsu

Intorn’à ‘ssu caffè           

Ùn fussi ch’un mumentu

Ritruvà lu to sguardu

Cusì dolce è clemente

In core à me stampatu

Una chjama impruvisa

Ùn ci hè più bellu azardu

Ùn fussi ch’una cria

Cuntemplà le to mani

In giru à ‘ssa tazzina

Mazzulu di veranu

È da tandu turnate

A mo vita u mo fiatu

Rivede u to surrisu

Notte è ghjornu ci pensu

U mo fiore d'alisu

Culombu à celu immensu

E to labbre seranu

Tandu u mo paradisu.

08/03/2020

Ci sì tù

Ch'è no ci trovimu soli
Ci sì tù ci sì tù
Chì ci annanni è ci cunsoli
Ci sì tù ci sì tù
Ancu tutta una nuttata
Cun a voce inzuccarata
È le to mani di fata
Ci sì tù o Mà

Venghinu venti è friddure
Ci sì tù ci sì tù
Malanni angosce o paure
Ci sì tù ci sì tù
Sempre cù lu tremu addossu
Lesta à porghjeci succorsu
Per fà smarì ogni morsu
Ci sì tù o Mà

Stella ùn avemu chè una
È sì tù è sì tù
Ùn hà prezzu sta furtuna
È sì tù è sì tù
Celu foscu o celu chjaru
Quella ch'o tenimu caru
Ùn hà indocu lu so paru
È sì tù o Mà

Sta canzona ch'o cantemu
Hè per tè hè per tè
Cun affettu a ti demu
Hè per tè hè per tè
Pè lu to bè li to asgi
Scoppa in mazzuli di raggi
È di centumila basgi
Hè per tè o Mà

Ghjuvanteramu Rocchi

https://www.youtube.com/watch?v=IwoCu6-oZ9M

Strani frutti

L'alburi di quì danu un fruttu di strana apparenza
Sangue nant'e so radiche, sangue in a frundulanza
Corpi negri mangananu in l'alitu di u Sudu
Stranu fruttu appesu à e rambelle di u piobbu

Imaghjina pasturale di u Sudu valentu
Un omu bocchitortu cun l'ochji di u spaventu
Dolce è frescu prufume di magnolià sbucciata
È l'odore impruvisu di a carne brusgiata

Quì ci hè un fruttu chì l'acellu pizzicherà
Chì a pioggia annacquerà, chì u ventu liccherà
Chì u sole infracicherà, chì l'arburu ferà cascà
Quì ci hè una racolta amara...

19/11/13

STRANGE FRUIT

Southern trees bear a strange fruit
Blood on the leaves and blood at the root
Black bodies swingin' in the Southern breeze
Strange fruit hangin' from the poplar trees

Pastoral scene of the gallant South
The bulgin' eyes and the twisted mouth
Scent of magnolias sweet and fresh
Then the sudden smell of burnin' flesh

Here is a fruit for the crows to pluck
For the rain to gather, for the wind to suck
For the sun to rot, for the tree to drop
Here is a strange and bitter crop.

WIGGINS, DWAYNE P./PEARL, MAURICE/ALLAN, LEWIS

Durante a prima metà di u 20u seculu, in i Stati di u sudu di l'America, i Negri eranu vittime di linciaghji (più di 5000 morti trà 1882 et 1968).
Mutilati, impiccati, staffilati o brusgiati davanti à una folla impassibile, u so unicu tortu era d'esse nati negri nantu à e terre di un'America razzista.
I corpi marturiati eranu cunsiderati cum'è troffei chì certi ritrattavanu per avè li in i so albumi persunali.


U linciaghju di Thomas Shipp è Abram Smith, 7 d'agostu di u 1930 in Marion, Indiana.


STRANGE FRUIT scrittu da Lewis Allan (1937) è cantatu da Billie Holiday hè un famosu requisitoriu (forse u più famosu) contru à st'orenda pratica.

https://www.youtube.com/watch?v=Web007rzSOI

https://www.youtube.com/watch?v=ughAVo2ZAag

***

Avia cridutu chi dopu à a pandemia di Coronavirus u mondu avessi da cambià...

Per disgrazia certe idee, certe mentalità ùn anu cambiatu :u razzismu hè cum'è a rimigna !

Riposa in Santa pace George Floyd.🙏🙏🙏

Dumane

Dumane veneraghju

à pichjà à a porta

cum'è eri, sai

quandu ti purtava u to giurnale.

È tù m'aspettavi

cun un basgiu è un caffè

daretu à a to porta di legnu

ch'u sole riscaldava.

Di cosa parlavamu ?

Di a vita, d'u tempu, d'a ghjente

certe volte ùn parlavamu micca.

Mi ne pentu.

Dumane lucerà u sole

canteranu l'acelli

veneraghju à pichjà ;

u marmaru hè silenziu:

sì andatu.

Ferraghju di u 2012

Tanti fiumi à francà

Tanti fiumi à francà

S’o pudessi truvà a mo strada

Solu mi sentu persu

È ‘ssi bianchi tippali ùn m’aiuteranu

Tanti fiumi à francà

U mo solu sperà, mi tene svegliatu

Tanti anni, tribulatu

A m’aghju francata grazie à a mo fiertà

Solitudine sì più chè un pesu

Esse solu hè una catena

Si n’hè andata ditemi perchè

È pienghje hè u mo vulè

Tanti fiumi à francà

Prima di principià vogliu aspettà

Ognitantu mettu à pensà

Ch’à qualcunu puderia tumbà

Tanti fiumi à francà

S’o pudessi truvà a mo strada

Solu mi sentu persu

È ‘ssi bianchi tippali ùn m’aiuteranu…

02/06/2020

D’appressu à Many rivers to cross, parulle Jimmy Cliff.

https://www.youtube.com/watch?v=SF3IktTk_pQ