E rosule di Saadi

T'aghju vulsutu purtà stamane duie rose

n'avia tantu in grembiu, regine maestose

chì i nodi strinti ùn l'anu pussute tene.

Si sò strappati i nodi. E rose vulate

in u ventu, sinu à u mare sò andate,

l'acqua anu seguitatu per ùn più rivene.

Rossa a matarasciata cum'è infiarata.

Ne ferma a mo rodda stasera prufumata

è nantu à a mo pelle u muscosu ricordu.

D'appressu à Les roses de Saadi*, Marceline Desbordes-Valmore

***

Natu in Chiraz versu u 1210 è mortu versu u 1291 Saadi fubbe unu di i pueti è cuntatori persani più famosi di l'epica medievale.

Hà scrittu frà altru u Golistan (l'ortu di e rosule) è u Bustan (l'ortu di i frutti).

Saadi hè cunnisciutu per à so maestria di a lingua è a prufundezza di e so idee.

Eranu e Palme...

T'avveni ?

U sole splendia
tuttu era felicità
un ghjornu di canti
di tavulini bianchi
di merli rossi
di fratellanza.

D'azuru era u cele
è allegra a rundinella
era tempu mele
di u tenesi caru
di l'eiu è tù.


Eranu e Palme
un ghjornu di tant'anni fà...
T'avveni ?
 O memoria...

E mo pruprietà

Pruprietariu

sò dinù eo

di duie lenze

di silenziu biancu

in fondu à u cerbellu

*

Propriétaire

je suis moi aussi 

j'ai douze arpents

de silence blanc

 tout au fond du cerveau

Kenneth White

Falla quantunque...

L'omi sò aspessu sragiunevuli, illogichi è centrati nantu à elli stessi, perdonali quantunque...
Sè tù sì bravu, ti ponu accusà d'esse egoistu è d'avè pensate sottintese, sia bravu quantunque...
Sè tù riesci, truverai falsi amichi è veri nemichi, riesci quantunque...
Sè tù sì francu è unestu, forse chì certi t'inganneranu...
Sia unestu è francu quantunque...
Ciò chè t'ai messu anni è anni à custruisce, qualchidunu puderebbe lampallu in terra in una nuttata, custruisci quantunque...
Sì tù trovi a serenità è a gioia, puderianu esse ghjalosi...
Sia felice quantunque...
U bè chè tù faci oghje, d'altri si ne seranu forse scurdati dumane...
Fà u bè quantunque...
Dà à u mondu l'ottimu chè tù ai , è ancu ùn seria micca abbastanza,
dalli quantunque l'ottimu chè tù ai...

Arricordati chì ghjè una storia trà Diu è tù è ùn hè mai stata trà tù è elli.

Mère Teresa di Calcutta.

Mascara

Ma ùn dì quale tù sì

pocu impreme di sapèlla

a vita a vole cusì

Arlecchinu o Pulcinella

sottu à a mascara turchina

ghjochi à a piattatella...

22 di ghjennaghju di u 2015

U mo paese quallà

Ma sò natu quallà in la nebbia misteriosa

in un paisucciu induve i muri catramati

aggrottanu marinari povari è testardi

sott’à celi di tonu, di cennara furiosa.

I stagni torbidi, i boschi tristi i campi nudi

è Nuvembre grisgiognu, u so mantellu ghjalume

è l’albori d’inchjostru, i tramonti negrufume

a mo corcia infanzia l’hà troppu bè cunnisciuti.

O paesi assulanati, di bellezze more

sì e vostre piaghje a vostra rena i vostri valloni

allunsiganu aspessu i mo più cari sogni

à ‘ssu paese caru ferma liatu u mo core.

Eugène Boudin, Port d’Anvers ( Orsay), 1871

D’appressu à Mon village là-bas, di Emile Verhaeren

Mais, je ne suis né las-bas, dans les brumes de Flandre,

En un petit village où des murs goudronnés

Abritent des marins pauvres et obstinés,

Sous des cieux d'ouragan, de fumée et de cendre.

Les marais noirs, les bois mornes et les champs nus

Et novembre grisâtres et ses cheveux de pluie

Et les aurores d'encre et les couchants de suie,

Ma brève enfance, hélas ! les a trop bien connus.

O vous, les pays d'or et de douce splendeur,

Si vos bois, vos ballons, vos plaines et vos grèves

Tentent parfois encor mes désirs et mes rêves,

C'est la Flandre pourtant qui retient tout mon coeur.

A ciuccia leghje l'almanaccu

A ciuccia leghje l’almanaccu*

Vicinu à l’ove a ciuccia leghje l’almanaccu
fora di i Santi, d’u tempu ch’ellu ferà
curiosa fideghja i segni d’u zodiacu
a Capra, u Toru i Pesci, l’Arghjetu eccetera.

È cusì mette à crede ingenua paisana
chì sopra à u so capu in le cunstellazioni
ci sò mercati pari, cumpagni di Diana
cun tori, capre è pesci, sumeri è muntoni.

Serà u mercatu di u Cele ch’ella leghje
è ghjunta à a pagina d’u segnu di e Stateghje
si dice chì in Cele, cum’è inde u merchente
si pesa u caffè u sale è e cuscenze.


28 di ghjennaghju di u 2017
Annu Novu chinese
Annu di u Ghjallochju di focu

*D’appressu à L’enfant lit l’almanach di Francis Jammes

Fratellu

Tù u fratellu ch'ùn aghju avutu

s'o t'avia cunnisciutu

n'averiamu fattu inseme,

zitellucci cari à tempu nati

ùn ci seriamu più lasciati

cum’è vechji amichi di sempre.

Averiamu amparatu a lettura

u libru di a vita, e fole

un ghjornu neve un ghjornu sole,

averisti forse briunatu

sì cun me qualchi innamuratu

vulia parte à l'avventura.

Ma ùn sì micca quì

è ùn hè colpa

nè d'u mo babbu

nè d'a mo mamma

hè cusi è sempre serà.

Tù u fratellu ch'ùn aghju avutu

sì tu sapessi  à u bughju

quante notte aghju pientu sola,

s'o t'avia avutu à u mo latu

sicura averisti truvatu

a parulluccia chì cunsola.

Sì a vita avia vulsutu

in dui averia spartutu

e strambacate è e risate,

averia ancu dimezatu

l'anniversarii è e vighjate

e prumesse à l'abbrucatu.

Ma ùn sì micca quì

è ùn hè colpa

nè d'u mo babbu

nè d'a mo mamma

hè cusì è sempre serà.

Tù quellu ch'ùn averaghju mai

mi sentu bè d'avetti fattu

ma fermi tù mutu è ciattu,

ti dirangiu mi perdunerai
quandu a vita dà è ripiglia
s'inventa omu una famiglia.

D'appressu à Mon Frère di Maxime Le Forestier.

Omayra

Quale seristi oghje

sì tù avii campatu ?

una mamma di famiglia
una sposa namurata,
sottu à u sole di Columbia

à mezu à la ghjente cara
quale seristi oghje
dimmila o Omayra...

Quale seristi oghje

sì nuvembre minacciosu

ùn t'avia cundannatu

à i guai è e suffrenze,

sì u vulcanu furiosu

ùn t'avia spiccatu
da l'amore di i toi

dimmila o Omayra...

Era zitelluccia eiu

è m'arricordu di tè

ciucciarella straziata
di a fanga prigiunera,

è di preghere è di pienti

fubbenu issi mumenti

sottu à l'ochji di u mondu

mi n'avvengu o Omayra...

Si n'era andata a sperenza
versu sponde scunnisciute
è fù cusì chì per sempre
i to ochji si sò chjosi,
aspettatu avianu tantu
un aiutu mai venutu
un sole ch'ùn lucerà
più per tè o Omayra.
                                            

U 16 di nuvembre di u 1985, in Columbia, dopu  à l'eruzzione di u vulcanu Nevado del Ruiz è trè ghjorni passati prigiunera di l'acqua cutrata è di blocchi d'astracu ,Omayra Sanchez more, davanti à e televisiò di u mondu sanu, testimoni di a so agunia.


Una pulemica hè nata, per via di l'incapacità di l'autorità columbiane à salvà a zitella (è tant'altre vittime) è u cumpurtamentu di quelli più penserosi di filmà o fotograffià chè di porghjeli succorsu.



Preghera amerindiana

Quandu ùn seraghju più quì, cappiatemi

lasciatemi parte.

Aghju tante cose da fà è da vede

ùn pienghjite micca pensendu à me,

siate ricunniscenti per ‘ssi belli anni,

v’aghju datu a mo amicizia,

m’avete purtatu tantu gioia.

Vi ringraziu per l’amore testimuniatumi.

Ora hè tempu per me di viaghjà solu.

Per una stundetta forse serete tristi

ma a fede vi purterà sullevu è ricunfortu.

Seremu separati solu qualchi tempu.

Lasciate i ricordi appacià u vostru dulore.

Ùn sò micca luntanu ,è a vita cuntinueghja…

Sè v’avete bisognu chjamatemi è veneraghju.

Ancu s’ùn mi pudete più vede nè tuccà seraghju quì

è ascultendu u vostru core risenterete a dulcezza di u m’amore .

Quandu serà tempu per voi di parte,

seraghju quì per accoglievi.

Assente di u mo corpu, presente cun Diu.

Ùn andate à pienghju nantu à a mo tomba,

ùn ci sò micca, ùn dormu micca.

Sò i mille venti chi soffianu,

sò u luccichime di i cristalli di neve,

sò a luce nantu à i campi di granu,

sò l’acqua dolce d’auturnu,

sò u svegliu di l’acelli in a matina serena

sò a stella chì splende in a notte,

ùn andate à pienghje nantu à a mo tomba,

ùn mi ci trovu micca, ùn sò micca mortu.

D’appressu à un testu scrittu da Charlotte Néwashish-Flamand (amerindiana di a nazione Atikamekw di Manawan) per l’interru d’u so ziu.



L'ombra

 

Mentre t’aspettava, in ‘ssu caffè,

di notte, à mezu à i briaconi

chì scaccanavanu per avè l’aria di ride,

mi paria chì tù ghjunghjissi tardi

è chì qualchissia ti seguitessi in carrughju.

Ti giravi prima di entre.

Insischita. Chjudii a porta.

È a to ombra firmava fora:

era ella chì ti seguitava.

A to ombra hè rimasta in carrughju

vicinu à ‘ssu caffè induve tantu spessu t’aghju aspettatu,

ma sì morta

è da tandu a to ombra cura à a porta

mi seguita à me, avà , quandu sortu

cun timore, cum’è una bestia.

S’o mi pientu si pienta.

S’o li parlu, si ne fughje.

06/06/15

L'OMBRE

Quand je t'attendais, dans ce bar,

La nuit, parmi des buveurs ivres

Qui ricanaient pour avoir l'air de rire,

Il me semblait que tu arrivais tard

Et que quelqu'un te suivait dans la rue.

Je te voyais te retourner avant d'entrer.

Tu avais peur. Tu refermais la porte.

Et ton ombre restait dehors :

C'était elle qui te suivait.

Ton ombre est toujours dans la rue

Près du bar où je t'ai si souvent attendue,

Mais tu es morte

Et ton ombre, depuis, est toujours à la porte.

Quand je m'en vais, c'est à présent moi qu'elle suit

Craintivement, comme une bête.

Si je m'arrête, elle s'arrête.

Si je lui parle, elle s'enfuit.

Francis Carco