Lamentu d'a Donna di Shalott

                                                        

Sò a Donna di Shalott, u fiume mi porta

ver di una riva scura chì m’apre a so porta

tetru viaghju da duve nisunu volta.

Cundannata à guardà u mondu in un spechju

senza mai scaglià o guai à u spavechju    

lampatu da l’arcanu di u mondu vechju.

                                          

Chjosa in una stanza da l'alba à l'abbrucà

giuvanotte è signori vidia spassighjà

tessendu l'ore sane tamantu benestà.

Un omu una donna, inseme sempre vanu

stonde di passione da me cusì luntanu

O quantu eiu prigava a fine di 'ssu dannu !

Scunsulata è ghjalosa di l’innamurate

l’interdettu scurdatu una fine d’estate

à Lancelot u bellu lampai duie ochjate.

Si scatenò u tonu è mi chjamò l’Infernu

era ghjunta per me l’ora d’u sonnu eternu

appettà u destinu hè una sfida indernu.

D’a Donna di Shalott ascultate lu pientu

è per l’ultima volta 'ssu tristu lamentu

si ghjaccia u sangue da compie u turmentu.

u 05 di lugliu di u 2015

Inspiratu da The Lady of Shalott, puema rumanticu di l’Inglese Alfred Tennyson (1809-1892).

“U puema The Lady of Shalott rilata una legenda arturiana inspirata da fonte medievale, ripigliendu temi chì si realizzeranu di manera più cumpletta in Idylls of the King induve u contu di Elaine hè narratu.

Secondu à a legenda era interdettu à a Donna di Shalott di guardà direttamente a realità esterna ; era cundannata à fidighjà u mondu attraversu un spechju è, nantu à una tappizzeria, messe à tesse ciò ch’ella vidia. Criscia u so addisperu mentre cannuchjulava coppii d’innamurati. Bramava un ritornu à a nurmalità. Un ghjornu, visse à Lancelot è messe à spiàllu, attraiendu una maledizzione. Durante a timpesta d’auturnu chì seguitò, a Donna imbarcò nantu à una barca induve scrisse  « The Lady of Shalott  » à l’avanti. Cantava u so lamentu navighendu versu Camelot è una morte sicura. U so corpu cutratu fubbe ritrovu da e donne è i cavalieri di Camelot frà i quelli Lancelot. Prigonu per u riposu di a so anima. A tappizzeria ch’ella avia fattu durante a so cattività ricupria i bordi di  l’imbarcazione.” (wikipédia)

The Lady of Shalott inspirò parechji pittori, frà i quali John William Waterhouse.

“I am half-sick of shadows,” said the Lady of Shalott
1915

http://www.lacoccinelle.net/266746.html