A ballata di a povara ghjente

O rè chì serete ghjudicati un ghjornu

Pensate à quelli ch’ùn anu un baiuccone ;

D’u populu amore abbiate cumpassione,

Prontu à zappà è prontu à fà a guerra

À pagà e tasse è à fà a tribbiera.

A povara ghjente hè dannata - hè cusì !

È a so soma sempre di più pisia.

I menu tocchi ùn anu u necessariu.

U fretu l’acqua eppo l’astru sulariu,

Per i disgraziati tuttu hè calvariu.

U corciu paisanu hà u so da fà

Tale à ‘sse bestie minate di staffile.

Hà fattu e vindemie, messu u fornu à scaldà

Per un pranzu un matrimoniu da accuncià,

Vene u signoru sempre di più vile ;

È nantu à u so vassalu in lu dannu,

Cum’è un acula l’artigliu, mette a manu,

« Eccumi ! » dice pigliendu pane è fruttu

Per i disgraziati hè calvariu tuttu.

15/03/2020

D’appressu à Ballade des pauvres gens, di Théodore de Banville.

Coronavirus

À capu di dui mesi

Dopu ghjuntu l’annu novu

Ci hè affaccatu un arnese

Di numaru dicianove

Di cunsunanza latina

Venutu si sà da a China

Tanti paesi culpisce

Dapoi ch’ellu hè natu

Ma u più chì mi ferisce

Hè ch’u mare hà francatu

Da casticà a più bella

A nostra cara isulella

Ùn ci vole à tuccassi a manu

Nè à basgiassi in carrughju

Sentu un sentimentu stranu

Mi pare d’esse à u bughju

O ch’ellu parti luntanu

È torni prestu u veranu !

Hè venutu da l’Asia

È ci face tutti pari

Di pettu à ‘ssa batteria

Siamu ricchi o povari

Ognunu pò esse toccu

Ùn hè micca un taroccu

Ma n’avemu vistu d’altre

Trà fiumare è timpesta

A fame a guerra è l’armate

In quarantacinque a pesta

Cun a fede sempre à latu

Un ghjornu ritorna a festa

Chjosi sò licei è scole

I parchi è i sinemà

A vi dicu nun sò fole

In casa ci vole à firmà

Pare un filmu di fizzione

A nostra realità

Prestu prestu à u Corona

Li feremu u funerale

Sentu digià a ciccona

Hè finitu u tempurale

Purteranu torna i ciucci

Maschere di Carnavale

In aspettendu a partenza

Di ‘ssu pessimu invitatu

Coronavirus chjamatu

Tenimu forte a sperenza

È preghemucila bona

Da u cininu à a mammona

10/03/20

Brama

Ùn fussi ch’una stonda

Pusà vicinu à tè

Fà di ogni seconda

Una stonda piacè

Cum’è di lugliu scorsu

Intorn’à quellu caffè       

Ùn fussi ch’un mumentu

Ritruvà lu to sguardu

Cusì dolce è clemente

In core à me stampatu

A chjama à l’impruvisu

Un ci hè più bellu azardu

Ùn fussi ch’una cria

Cuntemplà le to mani

In giru à ‘ssa tazzina

Mazzulu di veranu

È da tandu turnate

A mo vita u mo fiatu

Vuleria ci pensu

Rivede u to surrisu

Culombu à cele immensu

U mo fiore d’alisu

E to labbre seranu

Tandu u mo paradisu.

A bellula entrata in grate

Damicella bellula, corpu longu è magru

Per un tufone strettu si n’entrò in grate

Surtia di malatia

Quì campendu ciatta ciatta

Ne fece un bellu ripastu,

Manghjò, ruzzicò in paperia

Prisutti è tutta a salameria !

In conclusione, eccula

Grassa, paffuta, tondula.

Techja techja, passata una settimana

Intesu un rimore, vole esce d’a tana,

Ma ùn passa più, crede ad un’illusione.

Dopu riflettutu un pocu

Dice : « sò misteri, eppuru hè u locu ;

Ci sò passata ùn seranu cinque ghjorni.”

Li dice un topu, videndula dassi rimenu

« Ò cummà ! Aviate tandu u corpu menu pienu. 

Magra site entrata è magra ci vole à sorte. 

A possu dì à d’altri, ciò ch’eo dicu à voi,

Ma acqua in bocca o seriate in l'imbrogli

Chì à u soiu ùn serà paru u vostru l'errore. »

07/03/20

D’appressu à La belette entrée dans un grenier, di La Fontaine.

A capana di u piscadore

Face notte. A capana misera hè chjosa,

U locu hè umbrosu, è si sente qualcosa

Chì face lume attraversu l’attrachju scuru.

Reti di piscadori sò appese à u muru.

In u scornu in fondu duve qualchi piattarellu

Nant’e scance d’a cridenza luce un pucarellu,

Si vede un lettone cun longhe tendine stanche,

Vicinu, una strapunta copre vechje panche.

Cinque ciucci, nidi d’anime, penciuleghjanu.

U caminu altu duve e fiaccule veghjanu

Arrussisce u sulaghju scuru ; fronte ghjimbata,

Una donna preca in ghjinochje cum’è malata.

Hè a mamma. Sola hè. Fora, di bianca sciuma,

À u cele i venti i scogli a nebbia a notte pagna,

L’oceanu lampa un singhjozzu di calamaru.

L’omu hè in mare. Da zitellu hè marinaru…

Face un‘aspra battaglia contru à u scuru azardu

Acqua o burrasca, ci vole à sorte, ci vole à parte

Chì i ciucci anu a fame. Parte a sera solu

Quandu l’acqua hè nant’e scale d’a punta d’u molu.

06/03/20

                                         pittura Juan Gonzalez Alacreu

D’appressu à La cabane du pêcheur, di Victor Hugo.

Desideriu-Federico Garcia Lorca

Desideriu

1920

Solu, lu to core calurosu

è nunda d’altru.

Lu mio paradisu, un campu

senza rusignolu

nè lira

cù un riu prudente

è una funtanella.

Senza ventu chì sprona

li frundami,

nè stella chì voglia

fà si fronda.

Una smensa luce,

chì seria una luciola

d’un altru ghjornu

in un campu

di sguardi rotti.

Chjaru riposu

duve tutti li nostri basgi,

nivuli sunadori

di l’eccu,

anderianu à sbuccià.

È lu to core calurosu

è nunda d’altru.

(Traduttu in lingua corsa da Guidu Benigni in Puesie scelte)

Cum’è tè

Vestuta di villutu avia l’ochji chjari

À fiancu à a so mamma in giru u parentatu

Ci fideghja distratta à u sole

Chì si ne và

U ritrattu hè ingiallitu ma ci viderai

L’amore in un surrisu una sera luntana

Li piacia à ascultà à Mozart è à Schumann

Cum’è tè cum’è tè cum’è tè cum’è tè

Cum’è tè cum’è tè cum’è tè cum’è tè

Cum’è tè ch’o fideghju cun amore

Cum’è tè chì t’addurmenti o tesora

Cum’è tè cum’è tè cum’è tè cum’è tè

Si n’andava à a scola in paese d’in ghjò

Amparava e leggi è i libri di storia

Cantava e granochje è e principesse

Di e fole

Li piacia a so puppatula i s’amichi

Soprattuttu Anna Ruth eppo Jeremie

È si serianu forse spusati in Varsuvia

Cum’è tè cum’è tè cum’è tè cum’è tè

Cum’è tè cum’è tè cum’è tè cum’è tè

Cum’è tè ch’o fideghju cun amore

Cum’è tè chì t’addurmenti o tesora

Cum’è tè cum’è tè cum’è tè cum’è tè

Si chjamava Sarah ùn avia ott’anni

A so vita era ghjochi, sogni di verani

Ma altra ghjente un ghjornu l’hà purtatu affanni

Avia i t’ochji chjari è avia a t’età

Zitelluccia tranquilla da tutti amata

Ma ùn hè micca cum’è tè nata quì è avà

Cum’è tè cum’è tè cum’è tè cum’è tè

Cum’è tè cum’è tè cum’è tè cum’è tè

Cum’è tè ch’o fideghju cun amore

Cum’è tè chì t’addurmenti o tesora

Cum’è tè cum’è tè cum’è tè cum’è tè

Cum’è tè cum’è tè cum’è tè cum’è tè

 03/03/20

Fotografia web, zitelli è donna daretu à i fili spinati in Birkenau

D’appressu à Comme toi (parulle Jean-Jacques Goldman)

https://www.youtube.com/watch?v=ySZBnMukO8g

O lu mo babbu è la mo mamma !

O lu mo babbu è la mo mamma ! O i mo cari defunti, chì avete campatu cun tanta mudestia in ‘ssa casuccia, à voi devu tuttu !

U to ardore, curagiosa mamma, u m’ai trasmessu. S’aghju sempre assuciatu a grandezza di a scienza à quella di a patria, hè perchè eru impastatu di i sentimenti chè tù m’avii ispiratu.

È tù, caru babbu, a to vita fù faticosa quant’è u to mistieru, m’ai mustratu ciò ch’ella pò fà a pazienza in l’impegnu à longu andà. À tè devu a tenacità in lu travagliu d’ogni ghjornu ; avii e qualità perseveranti chì rendenu e vite utili, è dinù l’ammirazione per l’omi di prima trinca è per e grandi cose. Guardà in sù, amparà sempre di più, circà à elevassi sempre, eccu ciò chè tù m’ai insegnatu. Amparendumi à leghje, eri penserosu d’amparammi a grandezza di a Francia.

Siate benedetti l’unu è l’altru, cari parenti, per ciò chè vo site stati, è lasciatemi dedicavvi l’omagiu fattu oghje à ‘ssa casa.

02/03/20

D’appressu à u discorsu di l’inaugurazione d’una lastra cummemurativa posta nantu à u muru di a casa nativa di Louis Pasteur in Dôle.

Discorsu fattu da Pasteur stessu, chì ne prufitta per ripurtà ‘ss’omagiu nantu à i so parenti smariti.

Corrida

Dipoi u tempu ch’aspettu

in ‘ssu pezzu bughjosu

sentu a ghjente chì ride è canta

in fondu à u curridò

qualchidunu hà toccu u marchjone

è sò corsu ver di u ghjornu

aghju vistu e fanfare e barriere

a ghjente à l’intornu.

À u pruncipiu m’hè parsu

ch’ellu era solu un ghjocu

ma l’usciu hè chjosu in ‘ssu locu

è l’aiutu scarsu

anu chjosu daretu à me

di paura ch’o mi n’andessi

ma a ferà finita
‘ssa stupida ballerina.

Serà seriu ‘ssu mondu ?

Serà seriu ‘ssu mondu ?

Andalusia mi n’arricordu

i prati è i catti vicinu

ùn mi face micca trimà

 ‘ssu mezu muschinu !

L’aghju da chjappà cun u so cappellu

falli girà cum’è un sole.

Stasera a moglie di u tureru

s’addurmenterà sola

serà seriu ‘ssu mondu ?

serà seriu ‘ssu mondu ?

n’aghju persiguitu ombre

guasi toccu e so ballerine

m’anu pichjatu forte in collu

da ch’eo mi chjini.

Da duve sorte ‘ss’acrubatu

cun u so custume di carta

ùn aghju amparatu à cumbatte

una puppatula

sente a rena sottu à u mo capu

chì piacè, quantu face prò

ch’ella venga a fine prestu

Andalusia mi n’arricordu

I sentu ride mentre spatansciu

sentu a trumbetta chì ribomba

Serà pussibule di ghjucà tantu

in giru à una tomba?

serà seriu ‘ssu mondu ?

serà seriu ‘ssu mondu ?

29/02/20

D’appressu à La corrida

Parulle Francis Cabrel

https://www.youtube.com/watch?v=IQ8OmLVn-f8

O Maria

O Maria sì tù sapessi

Quantu male ch’aghju addossu

O Maria s’o pudessi

In bracce à tè truvà riposu

Svanita la mo nucenza

Eri per me l’ultima scenza

Pocu à pocu ti ne vai

Malgradu i mo sforzi addisperati

È più nunda serà cum’è prima

Aghju vistu più morte chè vita

L’omi sò tocchi di scimità

Cos’ùn deria per sminticà…

O Maria sì tù sapessi

Quantu male ch’aghju addossu

O Maria s’o pudessi

In bracce à tè truvà riposu

Corgu da l’alba à l’abbrocu

Senza sapè duve vocu

In lu rimore in lu fume

Vecu u sangue corre à fiume

Pianu pianu s’avvicina u ghjornu

Ci vulerà à esse curagiosu

Cullà à u fronte in prima ligna

Ti pregu fammi un segnu o Maria

È chjinatu in l’erba mi svegliu

Aghju avutu a morte à fiore di pelle

È m’hà prumessu un rigalu

Vacanze cun u s’ultimu ballu

O Maria sì tù sapessi

Quantu male quant’affanni

In cele t’aspetteraghju

Chè tù venga à ritruvammi

In cele t’aspetteraghju

Chè tù venga à ritruvammi

11/01/20

 (Marie, parulle Gérald de Palmas)

 https://www.youtube.com/watch?v=iJzKTJ0d5uk

Statua di donna cun e mani liate

Ognunu ti dà subitu u nome di statua

Ed eo ti chjamu donna.

Orni un giardinu publicu.

Da luntanu ci inganni.

Omu crede chè tù sia mezu arritta

In ricordu di un bellu sognu,

Pigliendu u to slanciu per campallu.

Da vicinu u sognu diventa chjaru :

Ai e mani liate in u spinu

Da una corda di marmaru

È cum’è tù ti teni, hè a to vuluntà

Di truvà qualcosa chì t’aiuti

À fughje l’angoscia di u prigiuneru.

T’hà cumandatu omu cusì à u scultore :

Una prigiunera.

Un poi tene in la to manu nè l’acqua

Nemmancu u minimu fiore.

E to mani sò liate.

Ùn hè solu u marmaru chì t’incatena

Tale Argus.Sì qualcosa avessi da cambià

In lu viaghju di i marmari,

Sì e statue entressinu in lotta

Da conquistà a libertà, l’ugualità

Cum’è i schiavi,

I morti

è u nostru sentimentu,

Tù camineristi

In ‘ssa cusmugunia di i marmari,

mani liate

Prigiunera.

Ognunu ti dà subitu u nome di statua

Ed eo ti chjamu donna.

Micca tantu perchè u scultore

Hà cunfidatu una donna à u marmaru

È chì e to iglie prumettenu

Una fertilità di statua,

Una bella racolta d’immubilità.

Per via di ‘sse mani liate chè tù ai

Da ch’o ti cunnoscu, da seculi,

Ti chjamu donna.

Ti chjamu donna

Perchè sì prigiunera.

27/02/20

Da una puesia di Kiki Dimoula, puetessa greca (06/06/31-22/02/20)

In Le peu du monde suivi de Je te salue jamais.Editions Gallimard

2010.

Cuscenza di l’inghjustizia fatta à e donne attraversu a cuntemplazione di una statua di donna.