Oceano Nox

O quantu marinari, quantu capitani

Chì sò partuti allegri per viaghji luntani,

In l’orizonte foscu si seranu svaniti !

Quant'averanu sparitu, ingrata furtuna,

In un mare torbidu a notte senza luna,

Sottu à l’uceanu per sempre sepelliti !...

Quantu patroni morti cun i  so equipagi

L’uraganu, d’a so vita hà strappatu e pagine

È in un lampu l’hà spaperse nantu à l’onda !

Nimu per ammentà cum’è una nave sprufonda.

S’hà chjappu passendu ogni marosu testimone,

À chì i marinari à chì a’mbarcazione.

Nimu sà a vostra sorte, corce anime perse !

Ciambuttate attraversu annigrite stese,

Fronti morti chì pichjanu scogli incunnisciuti

O quantu vechjetti stanchi, in core un sognu,

Sò morti aspettendu nant’a rena ogni ghjornu 

Quelli ch’ùn vulteranu più !

………………………………………………………………………………

Duve sò i marinari morti in l’uscurità ?

O marosi, n’avete storie tetre da cuntà !

O marosi, spaventu d’e mamme indinuchjate !

E vi cuntate ad altu mare frà di voi,

Ed hè ciò chì vi face ‘sse voci addisperate

Chè vo avete a sera venendu ver di noi !

22/03/2020

D’appressu à Oceano Nox (frammentu) di Victor Hugo.