« Quandu
qualchissia và à u teatru o à un cuncertu o à una festa qual’ella sia, sì u
spettaculu li piace, parla subitu di quelli di a so famiglia ch’ùn sò pussuti
vene è li dispiace: « averia fattu piacè à a mo surella, à u
mo babbu d’esse quì » cusì penserà, prufittendu di u spettaculu cun un piacè
mischiatu di malincunia. Hè quella ch’o risentu, mancu tantu per i membri di a
mo famiglia, seria meschinu, ma per tutti quelli chì per via d’una mancanza di
mezi o colpa à i so malanni ùn ponu prufittà di u bè supranu chjamatu bellezza,
volesi dì vita, bontà , serenità è passione.
Per ‘ssa
cagione ùn aghju mai libri in casa. È quandu n’aghju compru unu, l’offru subitu,
n’aghju datu un’infinità. Hè per ciò chì ghjè veramente un onore per me d’esse
quì cun voi, felice d’inaugurà ‘ssa biblioteca di u populu, di sicuru a prima
di tutta a pruvincia di Granada.
L’omu ùn
campa chè di pane. S’o patissi a fame è mi truvessi spruvistu in carrughju,
ùn dumanderia micca solu pane ma un mezu pane è un libru. È da duve ci truvemu
dicu a mo zerga contru à quelli chì parlanu sempre di rivindicazioni economiche
è mai di rivindicazioni culturali, quelle chì u populu brama. Chì l’omi
manghjessinu hè una bona, ma l’omi devenu accede à u sapè, ch’elli prufitessinu
di tutti i frutti di a mente osinnò turneranu ad esse mascine à u serviziu di u
statu, schiavi d’una terribile organisazione suciale.
Aghju più
cumpassione per un omu chì vole amparà è ch’ùn pò, chè per un omu chì hà a
fame. L’omu chì hà a fame si manghja un troncu di pane o qualchi fruttu. Ma
quellu chì hà a fame d’amparà è ùn ne hà i mezi soffre d’una angunia tremenda
perchè hà bisognu di libri, di libri, assai libri…Ma induve sò ?
Libri !
Libri ! Parulla magica, hè quant’è à mughjà : « Amore ! Amore !» è sò ‘ssi libri chì i populi duverianu dumandà quant’elli
dumandanu pane o acqua per e so racolte.
Quandu u
famosu scrivanu russiu Fédor Dostoïevsky-babbu di a revoluzione russia pìu chè
Lénine-era prigiuneru in Siberia, tagliatu d’u mondu, trà quattru muri,
circundatu da piaghje disulate, annivate, dumandava aiutu à a so famiglia
luntana scrivendu solu : « mandatemi libri, libri, libri in
soprapiù chì a mo anima ùn morga micca ! » Patia u freddu ma focu ùn ne
dumandava, patia una sete scema ma acqua ùn ne dumandava, dumandava libri vale à dì
orizonti, vale à dì camini per cullà in cima di a mente è di u core. Chì
l’angunia fisica-biologica, naturale d’un corpu- colpa à a fame, à a sete, à u
freddu dura pocu, dura puchissimu, ma l’angunia di l’anima insudesfa dura una vita
sana.
U grande
Menendez Pidal, unu di i più grandi veri savii d’Auropa l’hà digià detta :
« u mottu di a Republica deve esse a cultura. » Solu attraversu ella
anderanu risolti i prublemi ch’ellu cunnosce u populu pienu di fede ma privu di
lume.
Ùn
smenticate mai chì a luce hè a l’origine di tuttu. »
05/04/2020
Discorsu di
Federico Garcia Lorca à l’inaugurazione di a bibliuteca publica di a so cità
nativa di Fuente de Vaqueros.
Granada
settembre di u 1931.
Federico
Garcia Lorca fù fucilatu da ribelli fascisti di u Generale Franco è u so corpu
lampatu in una fossa cumuna in Viznar. Dopu à a caduta sanguinosa di a
Republica, u regime di Franco ordinò l’interdizione cumpletta di e so opare
sinu à u 1953 quandu Obras completas fù publicatu.
(trattu da
elcorreo.eu.org)
