Solu à chì rinuncia hè scunfittu (Paulo Coelho)

Una fronda, quand’ella casca da l’alburu l’inguernu, pò pensà ch’ella hè stata scunfitta da u freddu ?

L’alburu dice à a fronda : « Hè u ciculu di a vita. Ai bellu chè dì "m'aghju da more", ma in realtà sì sempre nantu à me. Grazia à tè sò vivu, avendu pussutu rispirà. Grazie à tè dinù mi sò intesu amatu, ch’aghju pussutu offre l’ombra à u viaghjadore stancu. U to suchju hè u mo suchju, ùn femu chè unu. »

Un omu chì s’hè preparatu anni è anni per cullà in cima di a muntagna più alta di u mondu pò pensà ch’ellu hè statu vintu, quand’ellu ghjunghje à u pede di u monte è chì u tempurale hè per principià ? L’omu dice à a muntagna : « Mi ricusi avà, ma u tempu hà da cambià è un ghjornu culleraghju in cima. In aspettendu ‘ssu mumentu fermi quì. »

Un giuvanottu, quand’ellu hè statu ricusatu da u so primu amore, pò pensà chì l’amore ùn esiste ? Dice u giuvanottu : « Un ghjornu scuntreraghju à qualchissia chì mi capiscerà è seraghju felice a mo vita sana. »

Ùn ci hè nè vittoria nè disfatta in u ciculu di a natura : ci hè solu muvimentu.

L’inguernu lotta per cuntinuà u so regnu, ma in fatta fine ricunnosce a  vittoria di u veranu, chì porta cun ellu gioia è fiori.

L’estate vuleria prulungà à l’infinitu e so ghjurnate calde, cunvintu ch’ellu hè chì u caldu face prò à a terra. Ma finisce per accettà l’arrivata di l’auturnu, chì permetterà à a terra di rifiatà.

A gazella manghja l’erba, ed ella stessa hè manghjata da u lione. Ùn si parla micca di a legge di u più forte, ma solu di a manera chì Diu ci mostra u ciculu di a morte è di a resurrezzione.

È ùn ci hè nè vincitori nè scunfitti, solu tappe ch’ellu ci vole à rispettà. Quandu u core umanu l’averà capita serà liberu. Accetterà i mumenti difficili senza lasciassi ingannà da i mumenti di gloria.

07/04/2020

D'appressu à Le manuscrit retrouvé, di Paulo Coelho.

Traduttu da u purtughese da Françoise Marchand Sauvagnargues.