U fruttetu

In l’ortu, inzuccaratu di carofuli è sambula

quandu l’alba hà incrusciatu a piverella frunduta

è chì i calafroni pazzi, appesi à e pumate,

trimuleghjanu, di guazza è di suchju imbriacati,

veneraghju sottu à l’azuru è a nebbia chì balla,

briaca di u tempu vivace è d’u ghjornu ritrovu ;

u mo core s’arrizzerà cum’è u ghjallochju à l’alba

chì canta senza piantassi ver di u sole novu.

L’aria calda è bianca allatterà a virdura,

u sforzu generosu è cautu di a piantina,

a ‘nsalata viva eppo u bussu di a cunfina,

a buchjula chì gonfia sinu à fà un’apertura.

A terra bangata induve maturisce a grana

ondulerà, allegra è dolce, un solcu dopu à l’altru,

fiera di sente in la so carne sottuterrana

u destinu di a vigna è di a biada serratu.

Prugnoni tornanu russini sopr’e foglie incollate

nantu à u muru di petra da u sole scaldatu ;

è a luce s’impachjerà di ogni chjassu scurdatu

duve ferà da vestitu l’ombra d’e viole sbucciate.

Cum’è un gustu di rinascita è di cosa suchjosa

cullerà da a zucca incrusciata è da u milone,

è meziornu infiarerà l’erba silenziosa,

serà cheta è longa ‘ssa ghjurnata di sulleone.

È a casa paterna cun u vechju tettu di teghje,

si lascerà a porta scura è l’alette aperte,

da rispirà l’odore di i rubi è di i cutogni,

pisiu è spapersu in tondu à i sepali verdogni;

Dolce è indifferente u mo core serà in pendita

cum’è u frundame soffice di e baghjine à l’ascosu

induve, a notte, a guazza si pone è serpighja

è scola senza guastalli u sognu nè u riposu.

Seraghju franca da l’amarezza è da u timore,

stanca cum’è un giardinu duve un tempu ci hà piossu,

cheta cum’è un stagnu chì luccicheghja è fuma à l’albore,

nisun penseru in mente nisuna suffrenza adossu,

ùn saperaghju più nunda di l’affari di ‘ssu mondu,

di e pene di a mo vita è di a mo nazione,

steraghju à sente cantà in u mo core prufondu

a pace armuniosa di a germinazione.

In u mo candore ritrovu è a mo semplicità,

ùn averaghju più nisun orgogliu è seraghju tale

à e mo surellucce, a gruseglia è a pampana

chì sò frà altre u piacè amabile di l’estate;

Da tantu seraghju cummossa è à ‘ssa terra liata

penseraghju esse ci stata digià interrata,

è mischiammi, da viva, à u misteru languente

chì nutrisce è fiurisce da i corpi tutte e piante.

Fatta fine serà ghjusta è serà bona di crede

chì i mo ochji ondighjanti sò cum’è issu linu,

è chì u mo core, ardente è pisiu, hè issa pera

chì maturisce pianu pianu à u sole estatinu…

26/02/20

D’appressu à Le verger, Anna de Noailles

Dilla (Words, F.R David)

Dilla ùn hè faciule

cume truvà a via per dì ch’o tengu à tè

ùn hè faciule

dilla ùn hè faciule

serà a sola via per dì ch’o tengu à tè

ùn hè faciule

Eccu sò un musicante

cun meludie in la mente

ma e mo parulle sò sgalabate

apru lu mio core à tè

spergu chè tù mi credi chì…

Dilla ùn hè faciule

cume truvà a via per dì ch’o tengu à tè

ùn hè faciule

Eccu a mo corcia canzone

scritta per tè cun passione

nisun sensu ascosu quandu dicu

ch’o ti tengu caru amore

è ti pregu credimi chì…

Dilla ùn hè faciule

cume truvà a via per dì ch’o tengu à tè

ùn hè faciule

ùn hè faciule…dilla ùn hè faciule

Dilla ùn hè faciule

cume truvà a via per dì ch’o tengu à tè

ùn hè faciule

ùn hè faciule

serà a sola via per dì ch’o tengu à tè

ùn hè faciule

D’appressu à Words, parulle Tommy Boyce/Bobby Hart

24/02/20

https://www.youtube.com/watch?v=2h7XPx1XJQo

Matine zitellesche

Ed era cuntenta tandu, ancu à mezu à u dulore.

U mo sguardu smaravigliatu s’apria tale un fiore.

A notte, presentia l’aurora è a so bocca ambrata.

Mi svegliava; mi piacia à u muru a carta culurata ;

Circava à induvinà s’ellu facia bellu à l’ortu ;

U sole à e tendine appiccava a so cullana d’oru.

Stava à sente u cantu chetu è pisiu ch’ella modula

A forte, a testarda ma tranquilla è vechja pendula.

Mi dicia in me stessa : « Eccu! Sett’ore di matina;

U ci passeremu à corre in l’erba ‘ssu ghjornu d’estatina,

Vicinu à u chjarasgiu dalmatu è à a cicala,

Un ghjornu sanu à paspà ciò ch’a natura ci rigala,

À corre appressu à a gioia in giru à i rusulaghji tondi,

À ballà in l’azuru chjaru cun i muschini giocondi,

À penciulà guasi, azzicati da a luce turchina,

Mustrendu u nostru visu più dolce, quellu d’a zitellina… »

22/02/20

D’appressu à Matins d’enfant, di Anna de Noailles.

Primu surrisu di u veranu

Mentre à e so opare vane

l’omi spatanscioni si ne vanu

Marzu ride di l’acque piuvane

è in secretu acconcia u veranu.

Per e piccule pratelline

in a campagna addurmintata

stira bianche cullarine

è bottuli d’oru intaglia.

In a vigna in l’ortu supranu

Va, tinghjidore nuttambulu

ciuffettu di cignu in manu

da infarinà l’amandulu.

Mentre a natura si riposa

Marzu fala à l’orte deserte

allaccia bottuli di rosa

à imbusti in villutu verde. 

Allegru cumpone sulfegi

ch’ellu fisca pianu à i merli

sumena ancu passaneve

è viulette quantu ne vene.

Nant’u criscione di a funtana

arechja pinza beie u cervu

cun a so manu ascosa sgrana

e campanelle d’u mughettu.

Sott’à l’erba, per chè t’a cogli

ci mette una fragula rossa

è da paratti da u sole

cappelli di fronde accozza.

È quandu a so faccenda hè compia

chì u so regnu hè per finisce

à u sogliu d’aprile dice:

“Veni o veranu a casa hè pronta !”

Livia-Maria Ciccoli

19/02/20

D’appressu à Premier sourire du printemps, di Théophile Gautier.

O casa di u mo babbu !

O casa di u mo babbu duve aghju filatu a lana,

induve e sere d’inguernu pusata à u fucone

stava à sente canzoni di quella vita isulana

eccu ch’hè ghuntu u tempu di lascià u to pentone !

Ed ogni sera, passagera in case nuvelle,

asculteraghju canzoni ch’ùn saperaghju micca ;

ed ogni sera, dopu à tante faccende nuvelle,

anderaghju in case ch’ùn cunnisceraghju micca.

Casa di petra induve quelli ch’o tengu caru

in mancanza di me pregheranu, addisperati,

in giru à u to focu spentu, inghjinuchjati,

quandu puderaghju torna a sera filà a lana,

vicinu à u fucone ascultendu vechje canzoni ?

18/02/20

Dappressu à O maison de mon père ! di Charles Péguy.

I separati

Ùn scrive. Sò trista mi vuleria spegne.

L’estati senza tè hè notte senza stelle.

Aghju chjosu ‘sse bracce ch’ùn ti ponu tuccà,

U mo core hè turnatu una tomba ghjalata.

Ùn scrive !

Ùn scrive. Ùn amparemu à l’altru l’addiu.

Quantu t’aghju tenutu...dumanda à tè, à Diu !

In fondu di u silenziu ascultà u t’amore,

Hè ascultà u cele senza lascià i fiori.

Ùn scrive !

Ùn scrive. Temu à tè ; temu a mo memoria ;

Colma di a to voce chì à spessu mi chjama.

Ùn mustrà l’acqua chjara à chì ùn a pò beie.

A to scrittura cara hè ritrattu di tè.

Ùn scrive ! 

Ùn scrive parulle ch’ùn senteraghju più :

Pare chì a to voce e mi sparghji in core ;

Ch’e veca risplende attraversu u to surrisu ;

Mi si pare chì un basgiu e stampi nant’u mo core .

Ùn scrive !

Livia-Maria Ciccoli

15/02/20

D’appressu à Les séparés, Marceline Desbordes-Valmore

Preghera per andà in Paradisu cun i sumeri

Quandu mi tuccherà à andà versu voi, o Signore, fate ch’ellu sia un ghjornu chì a campagna serà in festa.

Sceglieraghju, cum’è l’aghju sempre fatta, un caminu per andà à modu meiu in Paradisu, duve ancu in ghjurnata lucenu e stelle.

Piglieraghju u mo bastone è per istrada anderaghju, è à i sumeri i m’amichi diceraghju : « sò u pueta è vocu in Paradisu, chì infernu ùn ci n’hè in casa di u Signore ».

Eppo aghjusteraghju : « Alò venite, cari amichi di u cele azuru, corce bestie chì d’un muvimentu d’arechja cacciate e mosche, i colpi è e vespe. »

Chè vo mi vecate à mezu à ‘sse bestie amate chì ghjimbanu u capu pianu pianu è s’arrestanu aghjunghjendu l’unghjule di manera cusì dolce chì v’arrecanu cumpassione.

Veneraghju seguitatu da e so mille arechje , seguitatu da quelli chì portanu e curbelle, quelli chì trascinanu e carrette di saltimbanchi, o carrette di piumacci o di latta, da quelli chì portanu tinelle inchjaccate, da sumere piene cum’è otre, à u passu sciancu, da quelli chì portanu pantaloni, per via di e muche turchine chì sgottanu, fatte da e mosche testarde accumpulate.

O Signore ,fate ch’o venga versu voi cun tutti i sumeri à fiancu.

Fate chì, in pace, l’anghjuli ci portinu ver di fiumicelli pampanuti duve tremanu chjarasge lisce cum’è a pelle di e zitelle, è fate chì ghjimbu in ‘ssu locu d’anime, nantu à e vostre acque divine, sia eiu tale à i sumeri chì spechjeranu a so umile è dolce puvertà à a chjarezza di l’amore eternu.

Livia-Maria Ciccoli
12/02/20

D'appressu à Prière pour aller au Paradis avec les ânes, Francis Jammes.

A morte di u cane

In prima c’era un gruppu annantu à a rena

chì fidighjava ùn sò cosa. « Un cane chì crepa ! »

mughjonu i ciucci  « chì vulete ch’ellu sia. »

È l’aghju vistu puvaracciu chì ghjacia.

L’oceanu li lampava a so sciuma addossu

dicia una : “trè ghjorni ch’ellu ùn s’hè mossu

eppuru li parlemu ma ùn apre l’ochji

-u padrone hè marinaru » disse un vechjottu.

Un pilotu affaccatusi in finestra :

« stu cane more d’ùn sente a voce maestra.

Ghjust’à puntu u so batellu entre in portu ;

u padrone hè per ghjunghje, ellu serà mortu .»

Vicinu à a povera bestia sò firmatu

ma cioca ùn trennicava nè corpu nè capu,

stava ochji chjosi, paria morta in terra

u so maestru hè ghjuntu à tempu à a sera,

Vechju anch’ellu, zembu cum’è purtendu a croce,

disse u nome di u so cane in sottuvoce.

È tandu stanca, aprendu i so ochji d’ombra

guardò u so maestru è un’ultima stonda

a bestia hà trennicatu a so povara coda

poi si n’hè morta…

Livia-Maria Ciccoli

10/02/20

D’appressu à La mort  du chien, Victor Hugo

Sì o ma sì

Tutti i m’amichi sò luntanu
u mo core s’hè tramutatu
e vacanze sempre in cità
i mo prugetti sò…caminà
è i m’amori…inventà

Sì o ma sì
sì o ma sì
o ma tù vidissi a mo vita
pienghju cum’è ridu
sì o ma sì
ma u m’avvene ferma grisgiu
u mo core transitu

È u tempu fila cum’è un trenu
vecu a ghjente chì prumena
ma aghju cusì poca scenza
chì s’ellu passa u benestà
ùn li saperaghju parlà

Sì o ma sì
sì o ma sì
o ma tù vidissi a mo vita
pienghju cum’è ridu
sì o ma sì
ma u m’avvene ferma grisgiu
u mo core transitu

U mo core si stà à u caldu
è lasciu passà u ventu
spente sò e mo voglie, in pulvina
è m’addurmentu tranquilla
nè bisbigliu nè sintimentu

Sì o ma sì
sì o ma sì
o ma tù vidissi a mo vita
pienghju cum’è ridu
sì o ma sì
ma u m’avvene ferma grisgiu
u mo core transitu

Sì o ma sì
sì o ma sì
o ma tù vidissi a mo vita
pienghju cum’è ridu
sì o ma sì
ma u m’avvene ferma grisgiu
u mo core transitu

LM Ciccoli
03/02/20

Si maman si, parulle Michel Berger

Parte nanzu à i mei

Ghjente chì balla intornu
à un corpu chì s’addurmenta
immensu amore
pè l’addiu à un parente
calmu calmu
pintu à culor di l’artifiziu
rusinu turchinu è biancu
è pianu pianu
nantu ad ogni labbra un surrisu
pè tutta la ghjente à fiancu
è senza più addisperu
si festighjeghja u m’interru

Fulena chì si ne vola
sottu à l’ochji cuntenti
s’adunisce à e luciole
per un ultimu mumentu
è per sempre
fermerà in mente

Aghju spessu bramatu
di parte nanzu à i mei
per ùn esse l’erede
d’a so fiamma chì si more
è andamine
in core ‘ssu sentimentu
ch’elli camperanu eterni
semplicemente
fessinu ch’a notte sia chjara
cum’è a i fochi di San Ghjuvà
è i so ochji aperti
pè festighjà u m’interru

Fratelli surelle mamma è babbu
à tutti vi tengu caru
ùn ne fate preghera
v’aspettu per istrada
a polvera mai rifiata
è cun l’anima allegra
lascendumi ferete festa
chì l’amore mai s’arresta…

Livia-Maria Ciccoli
16/01/20

(Partir avant les miens, parulle Daniel Balavoine)
image web

Hijo de la luna

Scioccu ch’ùn capisce
a legenda chì dice
chì una zingara
a luna pregò sinu à u fà di u ghjornu
pienghjendu dumandava
un omu ch’a vuleria spusà per amore

« Averai u to sposu
donna bruna »
da quassù rispose
a luna
« ma derai in scambiu
u to primu fantu
appena appena natu…”
Quella chì per l’omu
lascia u so figliolu
pocu l’averà amatu

Luna voli esse mamma
ma ùn trovi l’amore
chì rispondi à ‘ssa chjama
dimmi luna d’argentu
senza bracce cume
annannà u zitellu
figliolu d'a luna

D’un zingaru moru
nasce u zitellu
bianca di culore
era a so pelle
e pupille grisge
micca verde alive
figliolu albinu d’a luna

« Tù scià maladettu
d’un gadjo l’erede
di un biancu di pelle »
Luna voli esse mamma
ma ùn trovi l’amore
chì rispondi à ‘ssa chjama
dimmi luna d’argentu
senza bracce cume
annannà u zitellu
figliolu d'a luna

L’omu credendusi desonoratu
cultella in manu
a so sposa circò
«‘ssu ciucciu ùn hè di me
m’ai ingannatu bè… »
à morte li minò
è u ciucciu in collu
attippò pè u collu
quassù l’abbandunò

Luna voli esse mamma
ma ùn trovi l’amore
chì rispondi à ‘ssa chjama
dimmi luna d’argentu
senza bracce cume
annannà u zitellu
figliolu d'a luna

Quandu a criatura
ride giuconda
di gioia la luna
diventa tonda
è quand’ella pientu
discresce da falli un viculellu d’argentu

Livia-Maria Ciccoli

13/01/20

https://www.youtube.com/watch?v=0iq9NeOCSNs

(Parulle in spagnolu : J.M. Cano - Adatt.in francese: D. Burgard)