A ghjurnata di travagliu s'era compia. Dopu chjosu u magazinu ùn avia ch'un'idea in capu, ghjunghje in Petracurbara, empie a bagnarola, aghjunghje ci aromu di tè verde è ciuttà mi nentru.
In vittura, risunavanu ritmi cubani. Dipoi ch'avia cuminciatu i corsi di salsà, m'era pigliata di passione per sta musica è cusì, un pede nantu à l'acceleratore l'altru battendu a misura, avia pigliatu a strada d'a casa. A cità ùn era ancu diserta, ci era sempre qualchi Bastiacciu, per u più zitelloni chì, passata l'angoscia di l'esami, ridianu è ciarlavanu nantu à a traversa, è i fideli di i caffè chì a s'allungavanu à rientre mentre tricava u sole à trapughjà.
Francatu a piazza Santu Niculà, rimarcai un omu ch'aspettava un passu per andà in Capicorsu. Ùn sendu troppu in ritardu mi cansai davanti à ellu. Mi ringraziò in un Thank you curtese è si calò in vittura. Era un omu d'una quarantina d'anni, appena troppu vestutu per a stagione cun ghjubbone in coghju è santiags. Ci parlaimu pocu è micca, ùn sapia u francese ed eiu mancu una parulla in inglese. Tenia nantu à i so dinochji un pezzu di cartone induve era scritta a so destinazione. Avia ghjuvatu assai vistu chì l'omu avia assicuratu l'orli frusti cun appena d'appiccicatoghju rossu. Un pocu distratta, ùn m'era accorta chì davanti à noi, a circulazione era piantata. Sciaccai un bruscu colpu di frenu. L'Inglese ùn ebbe nisuna reazzione, quant'è ch'ùn l'avessi mancu avutu accantu.
Un sò più cume aghju persu u cuntrollu d'a vittura, m'arricordu di l'entrata di Grisgione, a prima ingirata, u ponte subitu dopu è più nunda.
U lindumane, Sebastianu u mo cucinu gendarme, era ghjuntu à vede mi à l'ospidale :
-Sì stata furtunata, ancu un pocu è ci lacavi l'achette.
-Campa chì c'era a ringhera in Grisgione osinnò mi ne falava nantu à u tettu d'u snack, sottu à u ponte.
-Chì ringhera ? Ai pichjatu in un muru à l'entrata di Siscu.
I pruprietarii anu purtatu lagnanza contru à tè: hè cusì chì si face, capisci, per l'assicuranze...ma sì in vita, hè u più impurtante.
-È l'omu accantu à me ?
-Quale ?
-Era davanti à a Camara di Cummerciu, una cartella in manu induve aghju lettu SISCO. L'aghju pigliatu cun me, andavamu in listessa direzzione.
-Ùn c'era nimu for di tè quandu simu ghjunti sopra à locu, a porta passaghjeru era cundannata è ùn averia pussutu sorte nimu.
Vecu chì sì stanca.Ti lasceraghju dorme.Ùn t'inchietà, dumane a memoria ti rivenerà.
Tè ! In vittura c'era stu sacchettu. Forse n'ai bisognu per u travagliu.
Arriposati bè !
Sebastianu mi basgiò è surtì d'a camara .
Ùn avia tanti lazii di fidighjà, pensendu à l'Inglese svanitu in a natura, ma appressu tuttu u sacchettu era ciò chì mi fermava d'u mo viaghju cun ellu. Ringuersciai u cuntenutu nantu à u lettu cun curiosità è apprensione mischiate.
Si ne falò u mo fiatu : sottu à una mansa di ducumenti, affaccava l'appiccicatoghju rossu d'a cartella di l'omu. Ritenendu u mo soffiu, pigliai u cartone trà u ditone è l'indice, cun dilicatezza. Da tantu fubbi surpresa da ciò ch'era scrittu nantu, mi scappò quasi d'e mani.
Sette lettere à u feltru negru, sette lettere è una destinazione...
19/01/14
