Fratellu

Tù u fratellu ch'ùn aghju avutu

s'o t'avia cunnisciutu

n'averiamu fattu inseme,

zitellucci cari à tempu nati

ùn ci seriamu più lasciati

cum’è vechji amichi di sempre.

Averiamu amparatu a lettura

u libru di a vita, e fole

un ghjornu neve un ghjornu sole,

averisti forse briunatu

sì cun me qualchi innamuratu

vulia parte à l'avventura.

Ma ùn sì micca quì

è ùn hè colpa

nè d'u mo babbu

nè d'a mo mamma

hè cusi è sempre serà.

Tù u fratellu ch'ùn aghju avutu

sì tu sapessi  à u bughju

quante notte aghju pientu sola,

s'o t'avia avutu à u mo latu

sicura averisti truvatu

a parulluccia chì cunsola.

Sì a vita avia vulsutu

in dui averia spartutu

e strambacate è e risate,

averia ancu dimezatu

l'anniversarii è e vighjate

e prumesse à l'abbrucatu.

Ma ùn sì micca quì

è ùn hè colpa

nè d'u mo babbu

nè d'a mo mamma

hè cusì è sempre serà.

Tù quellu ch'ùn averaghju mai

mi sentu bè d'avetti fattu

ma fermi tù mutu è ciattu,

ti dirangiu mi perdunerai
quandu a vita dà è ripiglia
s'inventa omu una famiglia.

D'appressu à Mon Frère di Maxime Le Forestier.

Omayra

Quale seristi oghje

sì tù avii campatu ?

una mamma di famiglia
una sposa namurata,
sottu à u sole di Columbia

à mezu à la ghjente cara
quale seristi oghje
dimmila o Omayra...

Quale seristi oghje

sì nuvembre minacciosu

ùn t'avia cundannatu

à i guai è e suffrenze,

sì u vulcanu furiosu

ùn t'avia spiccatu
da l'amore di i toi

dimmila o Omayra...

Era zitelluccia eiu

è m'arricordu di tè

ciucciarella straziata
di a fanga prigiunera,

è di preghere è di pienti

fubbenu issi mumenti

sottu à l'ochji di u mondu

mi n'avvengu o Omayra...

Si n'era andata a sperenza
versu sponde scunnisciute
è fù cusì chì per sempre
i to ochji si sò chjosi,
aspettatu avianu tantu
un aiutu mai venutu
un sole ch'ùn lucerà
più per tè o Omayra.
                                            

U 16 di nuvembre di u 1985, in Columbia, dopu  à l'eruzzione di u vulcanu Nevado del Ruiz è trè ghjorni passati prigiunera di l'acqua cutrata è di blocchi d'astracu ,Omayra Sanchez more, davanti à e televisiò di u mondu sanu, testimoni di a so agunia.


Una pulemica hè nata, per via di l'incapacità di l'autorità columbiane à salvà a zitella (è tant'altre vittime) è u cumpurtamentu di quelli più penserosi di filmà o fotograffià chè di porghjeli succorsu.



Preghera amerindiana

Quandu ùn seraghju più quì, cappiatemi

lasciatemi parte.

Aghju tante cose da fà è da vede

ùn pienghjite micca pensendu à me,

siate ricunniscenti per ‘ssi belli anni,

v’aghju datu a mo amicizia,

m’avete purtatu tantu gioia.

Vi ringraziu per l’amore testimuniatumi.

Ora hè tempu per me di viaghjà solu.

Per una stundetta forse serete tristi

ma a fede vi purterà sullevu è ricunfortu.

Seremu separati solu qualchi tempu.

Lasciate i ricordi appacià u vostru dulore.

Ùn sò micca luntanu ,è a vita cuntinueghja…

Sè v’avete bisognu chjamatemi è veneraghju.

Ancu s’ùn mi pudete più vede nè tuccà seraghju quì

è ascultendu u vostru core risenterete a dulcezza di u m’amore .

Quandu serà tempu per voi di parte,

seraghju quì per accoglievi.

Assente di u mo corpu, presente cun Diu.

Ùn andate à pienghju nantu à a mo tomba,

ùn ci sò micca, ùn dormu micca.

Sò i mille venti chi soffianu,

sò u luccichime di i cristalli di neve,

sò a luce nantu à i campi di granu,

sò l’acqua dolce d’auturnu,

sò u svegliu di l’acelli in a matina serena

sò a stella chì splende in a notte,

ùn andate à pienghje nantu à a mo tomba,

ùn mi ci trovu micca, ùn sò micca mortu.

D’appressu à un testu scrittu da Charlotte Néwashish-Flamand (amerindiana di a nazione Atikamekw di Manawan) per l’interru d’u so ziu.