Amsterdam

In portu d'Amsterdam

Cantanu marinari

I so sogni testardi

À u largu d'Amsterdam

In portu d'Amsterdam

Dormenu marinari

Cum’è centu bandere

Longu à e sponde amare

In portu d'Amsterdam

Morenu marinari

Techji di biera è pienti

À l'albore nascente

In portu d'Amsterdam

Nascenu marinari

In u caldu chì annanna

Filacori landani.

In portu d'Amsterdam

Manghjanu marinari

Nantu à bianche tuvaglie

Pesci d’oliu bagnati

Mostranu denti longhi

Da manghjassi u mondu

Da inghjotte a luna  

I stragli unu à unu

Odori di pomi fritti

È baccalà mischiati

Chì e so grandi mani

Torna dumanderanu

Si ride è si rotta

Un fraiu di timpesta

Chjodenu a so scruchjetta

Alzendusi di a tola.

In portu d'Amsterdam

Ballanu marinari

Strufinendusi a panza

Nantu à quella d’e donne

Si gira è si balla

Sinu à u giracapu

In lu cantu languente

D’un urganettu stancu

È à collu in daretu

Sentesi scaccanà

È sente l’urganettu

Manu à manu spirà

Tandu l’aria sulenna

Tandu u sguardu altieru

Portanu la so pena

Da lume à addisperu.

In portu d'Amsterdam

Beienu marinari

Beienu in soprappiù

Eppo beienu torna

Beienu à a salute

D’e puttane d'Amsterdam

Di Hambourg o d’altrò

Sò tante è tante donne

Chì danu lu so corpu

À tempu à a so virtù
Per un sollu in oru
È quandu ùn ci hè più sete

L’ochji ver di u cele

Si sciuscianu in e stelle

Piscianu cum’è piengu

Nantu à e donne infidele

In portu d'Amsterdam

In portu d'Amsterdam.

29/04/2020

D’appressu à Amsterdam (parulle Jacques Brel).

https://www.youtube.com/watch?v=V3BSj1cHX-M

Mille culombe

L’invernu hè quì nantu à i tetti in paese

U cele hè biancu sentu cantà voci di zitelli

In a vechja chjesa nant'un organu vechju anch’ellu

Pace nantu à u mondu sanu per i centumila anni

Dateci mille culombe à tutti i lindumani

Dateci mille culombe millioni di rundinelle

Fate chì l’omi un ghjornu sianu torna zitelli

Dumane noi ùn feremu più guerre

I canoni durmeranu sottu à i fiori

Un bellu mondu ùn cunnosce nisun timore

Pace nantu à u mondu sanu per i centumila anni

Dateci mille culombe à tutti i lindumani

Dateci mille culombe millioni di rundinelle

Fate chì l’omi un ghjornu sianu torna zitelli

Pace nantu à u mondu sanu per i centumila anni

Dateci mille culombe à tutti i lindumani
Dateci mille culombe millioni di rundinelle

Fate chì l’omi un ghjornu sianu torna zitelli

27/04/2020

D’appressu à Mille colombes (parulle Eddy Marnay -  Claude Lemesle)

https://www.youtube.com/watch?v=TZmaYuOGO6Q

E 3 campane

Paese in fondu à a valle

Cum’è scantatu abbandunatu

Eccu in a notte stellata

Chì un bambinellu ci hè datu

Ghjuvan Francescu chjamatu

Paffutu, biondi i so capelli

In chjesa bellu principellu

Dumane serai battizatu.

Sona sona una campana

D’ecu in ecu a so chjama

Dice à u mondu stunatu :

« Ghjuvanni Francescu hè natu 

Hè per accoglie a so alma

Fiore appena sbucciatu

Piccula piccula fiamma

È chì trimulendu brama

Prutezzione è amore.»

Paese in fondu à a valle

Luntanu i camini l’umani

Dopu à dicianove anni

Ghjuvan Francè cummossu assai

Piglia per moglia à Lesia

Bianca cum’è un fiore di melu

Davanti à Diu in a chjesa

U spusaliziu fubbe bellu.

Sonanu tutte e campane

D’ecu in ecu e so chjame

Sò allegre è maestose

Da festighjà i dui sposi

« Core unu anima una »

Disse u prete « è per sempre

Siate ‘ssa fiamma pura

Chì s’innalza da fà sente

Quant’hè grande u vostru amore. »

Paese in fondu à a valle

U tempu fughje i mesi l’anni

Eccu in la notte stellata

Chì per sempre dorme Ghjuvanni

A carne hè cum’è l’erba

Cum’è u fiore à u veranu

Frutti, mazzuli, fasci è granu

Un bel ghjornu si siccheranu.

Sona sona una campana

A so canzona in lu ventu

Affannosa è monotona

Pare dì à i presenti:

« Ùn trimate cor’ fideli

Diu vi ferà segnu un ghjornu

Truverete à fiancu à ellu

Incù a vita eterna

L’eternità di l’amore. »

26/04/2020

D’appressu à Les 3 cloches (parulle Jean Villard)

https://www.youtube.com/watch?v=rVuKLxx-ETY

https://www.youtube.com/watch?v=ecLnHEAAJv8

Ghjustu dopu

Hà spentu u lume eppo

Cosa averà pussutu fà

Ghjustu dopu ?

Spassighjà, nisun misteru

Smenticà sangue è eteru

Serà statu u ghjornu a notte

Ghjustu dopu ?

Una stunduccia à pregà

O stà zitta è pensà

À 'ssu rigalu pregiatu

Cosa hà fattu ?

Cicculata, bumbò menta

In stacca l'averà sempre

Per 'ssi mumenti

U registru un furmulariu

U so campà l’urdinariu

U s’universu

Averà scrittu qualcosa

O finitu un libru forse ?

Una sigaretta ?

Di sicuru hè torna andata

Da guardallu rispirà

È s’hè addurmintata

Cheta cum'è 'ssu nucente

Chì durmia ùn sapendu

Chì sinu à quì n’emu pientu

Ma cosa si pò fà

Fattu què ?

24/04/2020

D’appressu à Juste après (parulle Jean-Jacques Goldman)

https://www.dailymotion.com/video/x7ryoc

https://www.youtube.com/watch?v=KMdJL-zpxUo

L’acula negra

Era ghjornu o notte qual’a sà

Arrent’un lavu m’era addurmintata

Quandu ghjunse propiu à l’ispensata

Un’acula negra da u celu mandata

Pianu l’acellu ale sparte

Pianu misse à girandulà

Vicinu è sbattulendu l’ale

Da u celu cascatu vense à rifiatà

Avia l’ochji culor rubinu

U piumame era di notte pintu

In fronte, di mille fochi accintu

L’acellu rè purtava un diamante turchinu

D’u so beccu m’hà toccu a guancia

Misse u collu in a mo manu manca

È tandu l’aghju ricunnisciutu

M’era riturnatu, d’u passatu venutu

Acula, aiò portami via

Riturnemu in paese di prima

Cum’è tandu in sogni zitellini

Per coglie trimuloni stelle è fànne camini

Cum’è in i mo sogni zitellini

Cum’è prima un nulu per cuscinu

Cum’è prima illuminà u sole

Fà piove à l’infinitu è fà maraviglie

L’acula sbattulendu e so ale

Si ne vulò da raghjunghje u celu

Era ghjornu o notte qual’a sà

Arrent’un lavu m’era addurmintata

Quandu ghjunse propiu à l’ispensata

Un’acula negra da u celu mandata

Era ghjornu o notte qual’a sà

Arrent’un lavu m’era addurmintata

Quandu ghjunse propiu à l’ispensata

Un’acula negra da u celu mandata

Un ghjornu, una notte

Arrent’un lavu, addurmintata

Quandu ghjunse

Propiu à l’ispensata

Ghjunse un’acula negra

Un ghjornu, una notte

Arrent’un lavu, addurmintata

Quandu ghjunse

Propiu à l’ispensata

Ghjunse l’acula negra

Un ghjornu, una notte

Arrent’un lavu, addurmintata…

22/04/2020

D’appressu à L’aigle noir (parulle Barbara)

https://www.youtube.com/watch?v=d9cEY13bUTo

L’anziani

L’anziani ùn parlanu più

O allora ogni tantu di u sguardu

Puru ricchi sò povari

Più nisun illusione anu un core per dui

Muscu di lavanda, di pulitu

D’erba barona, di parlatu anticu

Campà in cità hè cum’è in campagna

Quandu omu campa assai

Serà d’avè risu troppu chì a so voce scaglia

Ammentendu ricordi

O d’avè pientu troppu chì e lacrime sempre

L’incroscianu l’ochji

S’elli tremanu appena

Serà di vede invechjà a pendula in legnu

Ch’omu sente in salottu

Dì di sì, dì di nò eppo dì « v’aspettu ».

L’anziani ùn sognanu più

Dormenu i so libri è sò chjosi i pianò

Misgettu hè mortu dinò

È biiendu u muscatu ùn cantanu più

L’anziani ùn movenu più

Gesti aggrinziti u so mondu hè bellu chjucu

D’u lettu à a finestra, d’u lettu à u futtogliu d’u lettu à u lettu

Surteranu una cria

À braccetta è vestuti di sticchitu

Per andà à sulia

À interrà una più vechja unu più aggrinzitu

Singhjuzzeranu appena

Smintichendu un’uretta a pendula in legnu

Ch’omu sente in salottu

Dì di sì, dì di nò eppo chì l’aspetta.

Ùn morenu l’anziani

S’addurmentanu un ghjornu è dormenu troppu

Sempre apperlamanu

Temenu di perdesi, si perdenu purtantu

È l’altru ferma solu

U megliu o u peghju u dolce o u severu

Eppo pocu impreme

Chì quellu chì resta si ritrova in infernu

Forse u viderete

Anch’à ella viderete in acqua o in tristezza

Traversà u presente

Scusendusi quasi d’ùn viaghjà più in fretta

È davanti à voi fughje per l’ultima volta a pendula in legnu

Ch’omu sente in salottu

Dì di sì, dì di nò, dì à elli « t’aspettu »

Ch’omu sente in salottu

Dì di sì, dì di nò, eppo chì ci aspetta.

20/04/2020

D’appressu à Les Vieux (parulle Jacques Brel)

https://www.youtube.com/watch?v=jDh9UeoIOjA

À voi (Here's to you)

À voi Nicolà è Bart

In i nostri cori firmate

È ‘ssu ultimu mumentu hè vostru

L’angunia u vostru triunfu. (x8)

19/04/2020

https://www.youtube.com/watch?v=xYa1izAwbCY

https://www.youtube.com/watch?v=vp420cZZ0c4

https://www.youtube.com/watch?v=gL5jgZLTBj0
https://www.youtube.com/watch?v=ZO7q9zoks50

Culpevuli « presunti » d’arrubecciu è di l’assassiniu di duie personne Nicola Sacco (36 anni) è Bartolomeo Vanzetti (39 anni) funu incarcerati, ghjudicati è cundannati à a carrea elettrica. Parechje voci si sò fatte sente pè dinuncià un prucessu arbitrariu è una cundanna à morte prununciata per via di l’origine taliana di i dui omi è a s’appartenenza à u muvimentu anarchistu.

Funu tombi u 23 d'agostu di u 1927 è riabilitati in u 1977 da u guvernadore di u Massachussets chì dichjarò u 23 d'agostu « ghjurnata di Sacco-Vanzetti ».

Joan Baez li dedicò a canzone Here’s to you esciuta in u 1971 (musica Ennio Morricone), dinù BO di u filmu Sacco è Vanzetti di Giuliano Montaldo.

Cumposta da quattru versi ripetuti ottu volte hè ispirata da e parulle di Bartolomeo Vanzetti à u ghjudice Thayer u 9 d’aprile di u 1927 dopu prununciatu a sentenza :

“Sì ‘ssa cosa ùn era mai accaduta averia passatu a mo vita à parlà in i scorni di e strette à omi disprezzanti.Averia pussutu more scunnisciutu, ignotu,un fiascu.Ma oghje ùn si parla di fiascu.Hè a nostra carriera è u nostru triunfu.Mai,in tutta a nostra vita averiamu pussutu sperà di fà à prò di a tulerenza, di a ghjustizia di a cumprensione mutuale trà omi, cum’è a femu oghje, propiu a casu.E nostre parulle, a nostra vita e nostre suffrenze ùn sò nunda.E nostre vite tolte, quella d’un bravu scarparu è d’un povaru mercante di pesci, quessa hè tuttu!

È ‘ss’ultimu mumentu hè u nostru,’ss’angunia hè u nostru triunfu”.

À i Stati Uniti Here’s to you hè diventata l’innu di u muvimentu per i diritti civichi in l’anni 70.

A gattiva reputazione

In paese senza pretenzione

aghju gattiva reputazione

ch’o dessi di rimenu o nò

mi guardanu in catarò

eppuru nun facciu tortu à nisunu

seguitendu u mo caminu chjuccutu

ma à a ghjente ùn li piace chè

eiu pigli u mo chjassu à me

nò à a ghjente ùn li piace chè

eiu pigli u mo chjassu à me

di me ognunu dice male

i muti nò, quessa hè nurmale

Per u quattordici di lugliu

ùn mi truverete in carrughju

musica chì marchja à u passu

a vi palesu mi ne passu

eppuru nun facciu tortu à nisunu

ùn ascultendu tromba nè tamburu

ma à a ghjente ùn li piace chè

eiu pigli u mo chjassu à me

nò à a ghjente ùn li piace chè

eiu pigli u mo chjassu à me

ognunu mi mostra di u ditu

i monchi nò, quessa hè capita

Scontru un ladru malavviatu

da un omu perseguitatu

per aiutallu m’inframettu

è pigliu l’omu per u pettu

eppuru nun facciu tortu à nisunu

lascendu fughje i ladri unu à unu

ma à a ghjente ùn li piace chè

eiu pigli u mo chjassu à me

nò à a ghjente ùn li piace chè

eiu pigli u mo chjassu à me

tutti mi si lampanu adossu

cum’è cani nantu à un ossu

Ùn circate u manduvinu

pè sapè di u mo destinu

m'aspetterà per strappacollu

a corda in giru à u collu

eppuru nun facciu tortu à nisunu

seguitendu un chjassu pocu cumunu

ma à a ghjente ùn li piace chè

eiu pigli u mo chjassu à me

nò à a ghjente ùn li piace chè

eiu pigli u mo chjassu à me

mi fidighjeranu impiccatu

i cechi nò, o chì peccatu !

18/04/2020

D’appressu à La mauvaise réputation (parulle Georges Brassens).

https://www.youtube.com/watch?v=26Nuj6dhte8

https://www.youtube.com/watch?v=ZN1TGK5FAas

https://www.youtube.com/watch?v=A1IAnGfMoKE

L’amanti di un ghjornu

Asciuvu i bichjeri in fondu à u caffè

Aghju u mo da fà, pocu da sunnià

Ma in ‘ssu decoru d’alcolu è di fume

Mi si pare sempre di vedeli ghjunghje

Quand'elli sò ghjunti

A manu in a manu

L’ochji maravigliati

Cum’è dui spusati

Purtendu a sulana

Anu dumandatu

D’una voce calma

Un tettu pè amàssi

In centru cità

È mi n’arricordu

Anu fidighjatu

L’aria intennerita

A camera ottu

À a carta ingiallita

È quandu aghju chjosu

A porta nant'à elli

Avianu tantu sole

In fondu à l’ochji

Ch’aghju quasi pientu

Ch’aghju quasi pientu.

Asciuvu i bichjeri in fondu à u caffè

Aghju u mo da fà, pocu da sunnià

Ma in ‘ssu decoru di fume è d’alcolu

Cusì l’emu trovi corpu contru à corpu

È l’avemu trovi

A manu in a manu

I so ochji chjosi

Versu lindumani

Vestuti di sole

L’avemu chjinati

Namurati è soli

In un lettu scavatu

In centru cità

È mi n’arricordu

Di avella chjosa

À u primu albore

A camera ottu

Di l’amanti d’un ghjornu

Ma anu ficcatu

In fondu à u mo core

Un sprichju di sole

È tanti culori

Chì mi scappa u pientu

Chì mi scappa u pientu.

Asciuvu i bichjeri in fondu à u caffè

Aghju u mo da fà, pocu da sunnià

Ma in ‘ssu decoru di fume è d’alcolu

Punghje u ricordu d'a camera ottu.

17/04/2020

D’appressu à Les amants d’un jour (parulle Claude Delécluse – Michelle Senlis)

https://www.youtube.com/watch?v=EBTIuFuS0LE

Di vede pienghje un amicu !

Di sicuru ci sò e guerre

D’Irlanda è l’omi senza amore

Di sicuru nimu s’avvede

L’America un vechju sognu

Di sicuru ùn hà odore

U sollu è suspira u famitu

È marchjemu nantu à i fiori

Ma...di vede pienghje un amicu !

Di sicuru tante disfatte

È Falcina chì si ne ride

Digià ghjimbemu u nostru capu

Stunati d’esse sempre arritti

Di sicuru l’omi ingannati

L’acellucci assassinati

Di sicuru un core transitu

Ma…di vede pienghje un amicu !

Di sicuru ‘sse ville stanche

Da ‘ssi ciucci di cinquant’anni

D’aiutalli u tempu manca

L’amore hà i so malanni

Di sicuru u tempu sfila

È ‘ssi metrò d’ammutuliti

È a verità chì ci evita

Ma…di vede pienghje un amicu !

Di sicuru hè lisciu u spechju

Nè u spirdu d’esse ghjudea

Nè l’eleganza d’esse negru

Ti credi lumignu ùn sì chè cera

È l’omi sò tutti fratelli

Più nisunu hè stupitu

Quandu sò lupi più ch’agnelli

Ma…di vede pienghje un amicu !

16/04/2020

D’appressu à Voir un ami pleurer (parulle François Rauber / Jacques Brel)

https://www.youtube.com/watch?v=dK2TCj0Q4Uc

Quand’ùn ci hè chè l’amore

Quand’ùn ci hè chè l’amore

Da offre in spartera

À quellu chì  ti spera

È vole campà d’amore

Quand’ùn ci hè chè l’amore

U m’amore eiu è tù

Da fà schiattà di gioia

Ogn'ora di ogni ghjornu

Quand’ùn ci hè chè l’amore

Per vive di prumesse

Nisuna altra ricchezza

Chè di credeci torna

Quand’ùn ci hè chè l’amore

Per copre di sulia

Urnà di maraviglia

U guffeghju di i borghi

Quand’ùn ci hè chè l’amore

Per unica cagione

Per unica canzone

È unicu succorsu

Quand’ùn ci hè chè l’amore

Per veste lu matinu

U corciu u malandrinu

In villutu in oru

Quand’ùn ci hè chè l’amore

Da offre in preghera

Di e suffrenze d’a terra

Semplice truvadore

Quand’ùn ci hè chè l’amore

Da offre à tutti quelli

Chì lottanu fratelli

In cerca di l’albore

Quand’ùn ci hè chè l’amore

Per traccià una via

È aiutà u destinu

Ad ogni crucivia

Quand’ùn ci hè chè l’amore

Per fà tace u cannone

È solu una canzone

Pè cunvince un tamburu

Tandu ùn avendu nunda

Solu a forza d’amà

Averemu in le mani

Nostre u mondu sanu.

15/04/2020

D’appressu à Quand on n’a que l’amour (parulle Jacques Brel).

https://www.youtube.com/watch?v=my7tRSYOdqU

A Parigina

A Parigina

À tè chì parli di rispettu

È mi faci sempre u rimbeccu

Di vultà l’estate in paese

Ti vogliu fà ‘ssa risposta

Più macagna chè altra cosa…

Ùn sò micca aiaccina

Chì ruvina chì ruvina

Ùn sò mancu di Palmentu

Chì scumpientu chì scumpientu

Eo ùn campu in Bastia

Ci hè da ride ci hè da ride

In Vignale ùn turneraghju

Pocu laziu pocu laziu

In Calviani ùn ci aghju e lenze

O chì scenza o chì scenza

Ùn sò micca d’a Gravona

Ti frastorna ti frastorna

È ùn aghju per Prunelli

Nè surelle nè fratelli

Stò in Denfert-Rochereau

Duve pigliu lu metrò

Pigliu u metrò pigliu u metrò

Erba barona o filetta

Tuttu aghju sminticatu

Ma nobody is perfettu

Serà quessu u mo peccatu

A dicu è a ripettu…

Ùn sò micca di Pumonte

Ùn sò micca di Cismonte

Ùn sò di u Castellare

Più pocu d'arrente mare

À tè ti piace a rena

À me e sponde d’a Senna

È mi piace a furesta

Rambouillet ch’ella sia detta

Ùn sò di u to rughjone

Chì pattone chì pattone !

Ùn sò micca curtinese

Di l’orsu ùn pigliu pratese

Ùn sò micca di a Custera

T’addispera t’addispera

S’ùn stò micca in Campile

Ùn mi caccià u fucile

Duve hà campatu babbone

Hè natu lu lamaghjone
U lamaghjone u lamaghjone...

Avale hè quasi a matina

M’addurmentu è hè stanca a rima

Ci vole à finisce a canzona

Truvà una cunclusione

Duve circà a'ispirazione ?

È tù chì ‘ssi venachese

Dammi à beie dammi à beie

Ch’o ti scrivi un puema

Nantu à a Corsica chì geme

Ùn aghju vistu castagni

Solu lagni solu lagni

Nemmancu alive verde

Sò finite le fragnere

Da lu monte à la marina

Più poca voce latina

Ti saluta lu pinzutu

Cun u fiascu è cun l’ambutu
Sò da vende case è tetti
E ricciate l'aranceti

Di megliu ùn possu spiegà

Per Corsica baccalà

È baccalà è baccalà !!!

03/11/2018

Adattazione libera di La Parisienne (parulle  Françoise Mallet-Joris - Michel Grisolia - Marie-Paule Belle).

L'acelli persi

A mane conta l’acelli

È vede chì li n’ammanca

Trè passare trè sturnelli

È una culomba bianca

Anu vulatu in altu

Da pudè basgià à Diana

È anu dimenticatu

A stradella più suttana

Prega chì nantu à una stella

Filante fianu ritornu

Si sente cum’è urfanella

Senza più lu so bonghjornu.

13/04/2020

D’appressu à Les oiseaux perdus, di Maurice Carême.

Un paese africanu

« U nostru paese era cumpostu à pocu pressu di duiecentu persone, stallate in a furesta longu u fiume ; cultivavamu u risu, cibu principale. Ogni famiglia campava in una casa custruita sulidariamente cun materie di e nostre loche. A taglia d’ogni pezzu di terra era secondu a capacità di travagliu di i nostri bufali. A racolta, chì guarantia una sicurezza alimentaria era accatastata in granaghji disposti arrente strada. U fiume dava ad ogni famiglia u pesciu, cumplementu à e biade, i frutti è i legumi. U fraiutu, a sulidarità è a reciprocità ùn eranu vane parulle, ed ogni annu era organizata una pesca cullettiva da fà riserve di pesciu siccatu. A cumunità pigliava in carica e veduve, l’urfagni, i vechji, i sminuiti. I tradipratichi* curavanu i malati è vighjavanu nantu à a salute di tutti. Un travagliu artigianale rispundia ad ogni bisognu : panni, mobuli, scarpi, arnesi…Un bonzu** arbitrava e letiche, vighjendu nantu à l’armunia suciale. U sentimentu generale, ispiratu da u buddismu, era chì tuttu hè sacratu. Quandu, nantu à un’imbarcazione à mezu fiume, mi venia a voglia di piscià, ùn la pudia fà senza avè prima dumandatu scusa à u fiume per u brutteghju. Sola ombra nantu à ‘ssu ritrattu, l’usu di diceppà, offesa à l’integrità di l’ambiente naturale.

[…]

Una volta, un capizzone mandatu da a Banca mundiale vense à passà qualchi ghjornu incù noi da studià u nostru modu di campà ; dopu esaminatu ogni parametru fece u so raportu, destinatu dunque à a Banca mundiale. Dicia chì a nostra cumunità, di sicuru simpatica, ùn pudia sviluppassi per via di u tempu  cunsacratu à attivittà impruduttive ».

Rispundia à i so bisogni essenziali ma ùn creava nisuna richezza finanziaria. Eccu !

Volesi dì chì, in u parlatu di a pseudo-ecunumia, ùn si campa micca di prudutti di a terra, solu di dullari : u dullaru dice u nivellu di ricchezza. Per furtuna, numerose cumunità tradiziunali campanu sempre di vere ricchezze… ma sinu à quandu ? Per essesi divoti corpu è anima à u vitellu d’oru, i populi techji si sò sviati d’e vere ricchezze ; ma cumu fallila capì ?

12/04/2020

Trattu da Vers la sobriété heureuse, di Pierre Rabhi.

*Tradipraticu : si dice di unu chì cura a ghjente cun metodi ch’ùn appartenenu à a medicina cunvenziunale, essendu piuttostu tradiziunali in certe cumunità africane. 

Hè dinù chjamatu guariscidore.

**Bonzu : monacu buddistu.

Ti tengu caru

Ti tengu caru

 sempre

d'un’altra manera...

cun ‘ss'ochji ch'ùn si vedenu più

‘sse mani staccate...

è sentu sempre u to passu

quandu à voce discreta, chjamu :

"O Bà..."

********************************************

24/06/2015