U lupu è a cicogna

I lupi manghjanu cun ingurdizia,

Sentite d'unu d'elli ‘ssa nutizia.

Manghjò cusì in furia un meziornu

Ch’ellu pensò di ùn più vede u ghjornu :

Un ossu l’era firmatu in gola.

Per furtuna per u lupu mutu

Passa vicinu à ellu una cicogna,

Li face segnu, cherendu aiutu.

Becchilonga, face da dutturessa

Caccia l’ossu è per l’operazione,

Dumanda paga, cum’ella hè permessa.

« A vostra paga ? » s’infiara u lupone

« Vulete ride o cummà !

Ùn v’abbasta d’avè vi la francata

È in gola à me d’ùn esse firmata ?

Aiò andate chì site un’ingrata 

Ch’ùn vi trovi mai sott’a mo patta ! »

03/04/2020

D’appressu à Le loup et la cigogne, di Jean de La Fontaine.