A funtana

Un ghjornu ch’o caminava

Nantu à un chjassu di paese

Chì u sole lucicava

Cun tante sperenze appese

Sentii meludiosu

Un cantu cusì graziosu

Quellu di una funtana

Vechja quant’è l’anni scorsi

Ci rifiatava Fasgiana

È i nostri antichi corsi

Li tenia cumpagnia

Una statua di Maria

Sempre vidia passà

Paisani è mule appressu

Carche di legnu à brusgià

Eppoi ghjunse u prugressu

Addiu mule è sumeri

Fidi cumpagni di eri

Oghje si ritrova sola

Chì tutti ‘ssi vitturoni

À beie l’acqua chì scola

Ùn francanu i riponi

È a soia a bibina

Preferita hè a benzina

Di sechje mancu parlà ne

Nè capanghjuli inturchjati

Cum’è e belle paisane

Firmate nantu à i ritratti

À ùn sente i so lamenti

È più pocu li so pienti

Ferma una cunsulazione

U sole ed hè sicura

Qualsiasi a stagione

Ci salva da a bughjura

È si rispechja ogni ghjornu

In la so onda cusì pura

A natura ùn hè cambiata

Solu u tempu hà mutatu

A filetta ùn s’hè scurdata

L’omu hà dimenticatu

Ciò ch’ellu ùn hà migliuratu

U prugressu hà tumbatu

05/01/20