More d’amà (Andria Brignole)

U muru di a mo vita hè lisciu

Più mi ci appiccu è più sguilliscu

U mo core sentu lagnà

More d’amà

Mentre chì stu mondu m’accusa

È chì u to amore mi ricusa

A mo vita ella si ne và

More d’amà.

More d’amà

À corpu persu mi vogliu affundà

U peccatu devu spià

Senza pudemmi disculpà

Lasciu stu mondu à i so affari

A gattivera à i so pari

Cusì mi vogliu cunsulà

More d’amà.

U nostru amore ùn pò più vive

Ùn li possu più fà l’evvive

Prima chè vedelu brusgià

More d’amà

Mi ne vogliu andà à capu altu

Vince prima d’esse disfattu

È per ùn avè da aghjurà

More d’amà.

More d’amà

È cum’è ùn ci hè più nunda à fà

Vogliu quì tuttu abandunà

Ditti tutta a mo fideltà

A mo fideltà

Sì u veranu sò l’auturnu

Per tè u m’amore hè tantu puru

Nova strada vogliu piglià

More d’amà more d’amà.

D’appressu à Mourir d’aimer (parulle Charles Aznavour)

Traduzzione in lingua corsa di Andria Brignole.

Pueta nativu di Olmeta di Tuda, Andria Brignole hà publicatu parechje puesie nantu à u settimanale Arritti.

Hè l’autore di duie racolte chjamate Puesie è ricordi (2004 è 2012) : puesie originali chì palesanu l’amore per i soi, u so paese, a lingua materna è dinù traduzzioni di capi d’opera di Hugo, La Fontaine, Brassens, Brel, Aznavour…

U pueta d’u Nebbiu si n’hè andatu à u riposu eternu l’11 di dicembre di u 2017.

« U ghjornu ch’ùn seraghju più podassi seraghju qualcosa
Puderaghju sorte di l’ombra ùn camperaghju più à l’ascosa
Senteraghju parlà di mè è seranu messe in valore
Almenu e mo più belle rime è e mo puesie altose


Podassi seranu stimate e mo più belle traduzzione
Stampate in lingua nustrale è cusì messe à l’onore
Fà parlà corsu à La Fontaine è un certu Victor Hugo
Cum’è Brassens è Jacques Brel è ancu l’amicu Pierrot »

(Andria Brignole, Marzu di u 2011)

A ballata di Florentin Prunier

Hà resistutu ùn sò quantu ghjorni

È a so mamma era à fiancu à ellu.

Hà resistutu Florentin Prunier

Chì a so mamma ùn vole ch’ellu morga.

Appena sappiutu ch’ellu era feritu,

Hè corsa  d’u fondu di a so campagna,

Hà traversatu u paese sottu à e bombe

Duve a curagiosa armata lotta in a fanga

U so visu hè chjosu sottu à a scufia

Ùn teme nunda nè à nisunu

Li porta dodeci mele in una sporta

È appena di butiru frescu.

Tutta a santa ghjurnata hè stata à pusà

Vicinu à u lettu duve Florentin more

Ghjunghje quandu s’accende u focu

Stà sinu à quandu Florentin delireghja

Sorte appinuccia quandu li si dice : « Uscite ! »

Chì ci vole à medicà u pettu feritu.

Ma steria s’ellu ci vulia à stà :

Hè mamma à pudè guardà a ferita d’u so figliolu.

Serà per ùn sente i mughji chì l’anu fatta sorte

À aspettà fora sottu à l’acqua ?

Hè vicina à u lettu cum’è un cane ch’aspetta

Ùn manghja più ùn beie più

Nemmancu Florentin, ch’ùn sà più manghjà :

U butiru hè invechjatu dipoi u tempu.

E so mani tribbulate cum’è radiche

Stringhjenu a manu secca di u so figliolu

Ùn li caccia l’ochji d’adossu

U so visu intintu di sudore hè biancu.

Vede u collu ingutuppatu di corde

Chì l’aria, passendu, face sventulà.

Vede tuttu què d’u so ochju ardente

Duru è seccu cum’è a rompitura di u silice

Guarda senza lagnassi mai :

Hè a so manera, cusì, d’esse mamma.

Florentin dice : « a tossa mi s’arrubba tutte e forze. »

Risponde : « a sai ch’o sò quì o figliolu ! »

Dice : « a sò ch’ella hè finita per mè ! »

Ella : « Innò, ch’ùn vogliu !! »

Hà resistutu ùn sò quantu ghjorni

È a so mamma era à fiancu à ellu

Cum’è un vechju nutadore in mare

Chì mantene à gallu u so figliolu debule.

Eppo una matina, cum’ella era stanca

Dopu à tante notti passate ùn si sà induve,

Hà ghjimbatu u capu,

Hà penciulatu appena ;

È Florentin in un lampu si n’hè mortu

Senza rimore da ùn  discitalla.

28/05/20

D’appressu à Ballade de Florentin Prunier, di Georges Duhamel (Elégies, 1920).

Georges Duhamel (1884-1966) hè statu medicu à l’Armate in a Guerra di u 14-18.

A "Ballade de Florentin Prunier" hè un esempiu intimu di i drami di a prima guerra : una mamma ghjunta à vede more u so figliolu à l’ospidale militare.

Scrittu senza rime cun parulle semplici u puema di Duhamel ùn hà altru scopu chè di palisà u macellu ch’ella hè stata ‘ssa guerra è per l’autore di rende contu di a so sperienza persunale è traumatizante di chirurgu militare, testimone di tante ferite e suffrenze di i sullati chì si sò battuti in Verdun.

https://www.youtube.com/watch?v=xIrmbZ1DrIc

L’albore hè sbucciatu

L’albore hè sbucciatu cum’è u primu albore

U merlu hà cantatu cum’è u primu acellu

Loda u cantu, loda l’albore

È ‘ssu Mondu chì sempre rinasce.

È dolce hè l’acqua di u Paradisu

Cum’è a prima guazza annantu à l'erba

Loda a dulcezza di l’erba croscia

Crisciuta sottu à u so passu.

Hè meiu ‘ssu sole hè meiu ‘ss’albore

Nati d’una luce in Paradisu

Loda cun gioia, loda ogni mane

Chì Diu hà creatu per tè.

L’albore hè sbucciatu cum’è u primu albore

U merlu hà cantatu cum’è u primu acellu

Loda u cantu, loda l’albore

È ‘ssu Mondu chì sempre rinasce.

24/05/2020

D’appressu à Morning has broken, di Cat Stevens (Steven Demetre Georgiou).

Morning has broken hè un famosu innu cristianu scrittu per a prima volta da Eleanor Farjeon in u 1931. Ripresa da u cantadore brittanicu Cat Stevens in u 1971 nantu à u so discu Teaser and the Firecat, ‘ssu titulu ferma unu di i so più grandi successi.

A prima versione di l’innu si trova in un libru di Cantichi di u 1931 chjamatu Songs of Praise. A musica hè una meludia tradiziunale gaelica Bunessan.

Morning has broken sparte ‘ssa meludia cun un cantu di Natale di u XIXu, Child in the Manger. Percy Dearmer, l’editore, hà spiegatu chì cum’ellu ùn esistia micca innu per lodà ogni ghjornu chì nasce, hà dumandatu à a puetessa è scrivana per zitelli, Eleanor Farjeon di “scrive un puema adattu à a meludia scuzzese.”

https://www.youtube.com/watch?v=e0TInLOJuUM

Photo: Catherine Millet, lever de soleil à Bastia.

A povara ghjente

(Frammenti)

Trimuloni cum’è s’ella avessi peccatu

Dice : «a sai ch’ella hè morta a vicina

Serà morta eri, ùn s’hè vista in cantina

Era in a serata, tù ti n'eri andatu.

Lascia dui orfagni, chjuchi, i curciarelli

U mascu hè Ghjilormu a femina Maddalena ;

Unu ùn marchja unancu è l’altra parla appena

Povara disgraziata era in u bisognu.»

L’omu, impenseritu lampò in un scornu

U so berettu frustu, crosciu da a timpesta.

“O Signore !” disse grattendusi a testa,

«Da cinque passeremu à sette figliulelli.

Focu spentu è pignatta rotta certe sere

Cumu avemu da fà cun duie bocche in più ?

Ùn li si pò dì : «travagliate !» chì sò chjuchi.

Vai à circalli. S’elli sò discitati

Averanu a paura soli cun a morta.

Hè ella, ùn la vedi, chì pichja à a porta.

Apri à ‘ssi criaturi, steranu mischiati;

Ci culleranu a sera nantu à i ghjinochji.

Camperanu. Fratellu è surella di i nostri...

Biieraghju l’acqua travagliendu a ghjurnata,

Hè detta. Ma cosa ai ? Sì cuntrariata ?

Di solitu, faci tuttu à a corsa.

- Mìlli sò quì !» dice aprendu a tendina rossa.

20/05/2020

D'appressu à Les pauvres gens di Victor Hugo (La Légende des Siècles).

Quandu Ovide a si caccia cun l'ape corse...😊

Ovide, Amori

Traduzione, Ulysse de Séguier (1879)

Elegia XII

Maladisce e tavulette* chì l’anu purtatu a risposta negativa di a s’amante.

A risposta hè trista, abbiate cumpassione

E soie e parulle : ”ùn ci serà unione! ”

[…]

Fora tavulette ! Cera maladetta

Duve sò zuccate ‘sse parulle di fele !

Un apa di Corsica, circhendu a civuta**

T’averà fattu di u più schifosu mele.

U culor vermiglione ùn ti facia muta ;

Ingannu ! era sangue, era saetta.

Vai à u crucivia o legnu miseru !

Eppo chì un carru t’inciacchi contr’un muru !

Quellu chì per fatti ti cacciò di l’aceru

Di e so duie mani era forse un impuru.

‘ss’alburu dà un scuru appoghju à l’impiccati ;

À u spietatu boia, tante è tante croci.

Sott’a so ombra stanu malacelle è falchi ;

A codibianca face sente a so voce.

È dì ch’aghju datu i mo voti à ‘ssu defuntu,

Cunfidenduli e mo parulle d’amore !

Ah ! Megliu forse li seria cunvenutu

U verbu d’un ghjudice pienu d’amarore ;

O i calculi di l’avaru impenseritu

Quandu s’hè avvistu ch'un assu l’hè smaritu.

Tavulette d’i mo guai, chjamate doppie !

‘ssu numaru a dicu m’hè statu fatale.

Ultimu auguriu è seria nurmale :

Vedevi finisce in qualchi cundottu !

19/05/2020

*Tavulette di cera (tabulae : tavule) : supporti di scrittura cunnisciuti da l’Antichità.

A tavuletta di cera hè cumposta d’una placca di 10 à 40 centimetri di lunghezza nantu à qualchi centimetru di larghezza è qualchi millimetru di spessore.

Hè scaravunata (évidée) nantu à l’area sana, cunservendu un orlu (rebord) di qualchi millimetru chì face da quadru.

A scrittura si face incidendu (zucchendu : en gravant) caratteri in a cera cun a punta di un stilettu. Ponu esse sguassati, s’ella ci vole, liscendu a cera cun l’orlu oppostu di u stilettu, più pianu.

A materia chì ghjova per a fabbricazione di e tavulette hè u legnu : bussu (buis), faiu (hêtre), agarognu (érable, dinù chjamatu aceru).

Materie più nobili sò state aduprate, soprattuttu in u Medievu (argentu, avoriu, ossu di balena).

A cera (raramente cera d’apa pura) hè aspessu tinta per ottene un’area di scrittura culurita o scura da ch’elle si vechinu megliu e incisioni à a luce.

I varii culori sò u negru (negrufume mischiatu à a cera), u rossu, u verde, u giallu, ottenuti mischiendu varii pimenti.

**Civuta : ciguë

In ‘ssu puema Ovide si lagna di un messaghju ricevutu nantu à una tavuletta di cera rossa (culore di passione), culore chì cuntradisce u cuntenutu (ricusu d’amore).

U penitenziariu

E porte di u penitenziariu

Prestu s’anu da serrà

È hè quì ch’o cumpieraghju a mo vita

Cum’è d’altri l’anu finita

Per me a mo mamma hà datu

U so vestitu di sposa

"Ùn vogliu esse perdunatu

Tù sola meriti losa"

Ùn hè per noi a sulana

Chì frabuttemu di notte

Una sera hè bancarotta

U lindumane hè cuccagna

Mamme un cunsigliu vi dò

Ùn ne lasciate figlioli

A notte in i carrughji soli

O si n’anderanu in prigiò

O tù chì m'ai tenutu caru
Ùn t’aghju sappiutu amà

È 'sse lacrime chì anu sculatu

Ci vole à sminticà

E porte di u penitenziariu

Prestu s’anu da serrà

È hè quì ch’o cumpieraghju a mo vita

Cum’è d’altri l’anu finita.

18/05/2020

D’appressu à Le Pénitencier, parulle Hugues Aufray, Vline Buggy.
Adattazione francese di a canzona folk americana, House of the rising sun.

https://www.youtube.com/watch?v=IZ03lzz0xjk

https://www.youtube.com/watch?v=uS90B4sZf7U

Mattilda

O Mà piglia u paternostru

È prega per u to figliolu

Mattilda hè di ritornu

Cantina, addiu u to vinu

Stasera cambiu di caminu

Mattilda hè di ritornu

È tù a serva tù Maria

Cambia i lenzoli è cusì sia

Mattilda hè di ritornu

Amichi statemi à fiancu

Sentu digià vene l’aggrancu

Mattilda chì sì ghjunta à fà ?

U mo core statti à l’appossu

È fà cum’è sì nunda fussi

Mattilda hè di ritornu

U mo core pienta u lamentu

Di dì ch’hè più bella chè nenzu

Mattilda hè di ritornu

U mo core ùn suspirà più

Chì t’hà feritu tantu è più

Mattilda hè di ritornu

Amichi statemi à fiancu

È pusate nantu à u bancu

Mattilda chì sì ghjunta à fà ?

E mo mani state tranquille

Hè un cane chì volta d'a villa

Mattilda hè di ritornu

E mo mani ùn sciaccamanate

Chì di ella ùn v’arricurdate

Mattilda hè di ritornu

E mo mani ùn trimulate

Tantu pientu avete asciuvatu

Mattilda hè di ritornu

E mo mani statevi chjose

È e mo bracce state ascose

Mattilda chì sì ghjunta à fà ?

O mà ùn pregà più indernu

U to figliolu hè in infernu

Mattilda m'hè riturnata

Cantina servi u to vinu

Tempu di pranzu è spusaliziu

Mattilda m'hè riturnata

È tù a serva tù Maria

Stinza u lettu cum'è prima

Mattilda m'hè riturnata

Amichi ùn m’aspettate più

M'ingannu una volta di più

Sinu à u so prussimu addiu
Addiu...

17/05/2020

D'appressu à Mathilde, parulle Jacques Brel.

https://www.youtube.com/watch?v=RMFFK4av-D4

https://www.youtube.com/watch?v=Exlx7PDDA4I

Kallocaïne (frammenti)

« In una sucetà duve a surveglianza di tutti, sottu à u sguardu vigilente di a pulizza, hè l’affare d’ognunu u chimistu Leo Kall mette à u puntu un seru chì offre à u Statu Mundiale l’arnese di cuntrollu  tutale chì l’ammancava. Privendu l’individuu di u so ultimu giardinu secretu, a Kallocaïne permette di sbuscà i sogni di libertà ch’elli anu certi citatini. Permetterà dinù à u s’inventore di supranà, dopu à una furzatura psichica, una crisa persunale chì rimetterà in causa parechje certezze soie.

È sì a misteriosa cità basata nantu à a fiducia ch’elli bramanu l’ultimi resistenti ùn era solu un sognu ? »

« E parulle è l’azzioni nascenu d'i sentimenti è d'u pensà. Perchè vulè teneli secreti ? Ogni camaratu-sullatu ùn hè a pruprietà di u Statu ? Tandu à quale puderianu appartene ‘ssi sentimenti è ‘ssu pensà, for di u Statu ? Ùn s’hè mai pussutu cuntrullali, oghje si pò fà. »

« Eppo aghju riflettutu è aghju capitu ch’ùn si pò avè fiducia in nisunu, a dicenu à a radiu, in e cunferenze ; hè scritta nantu à i pannelli ch’omu vede in i metrò o in i carrughji : nisunu hè insuspettevule, ogni relazione, puru a più vicina pò esse tradimentosa. »

15/05/2020

Kallocaïne (di Karin Boye) publicatu in u 1940 in Sveda hè una di e quattru grandi distupie* di u XXu seculu cun Nous autres (Zamiatine, 1920), Le meilleur des mondes (Huxley, 1932) è 1984 (Orwell, 1949).

I rumanzi di distupia si sò sviluppati trà e duie guerre cun u cuncettu di tutalitarisimu. Kallocaïne hà influenzatu à Orwell per 1984 in certi punti : calata di u nivellu di vita, ricorsu à un giurnale intimu, denuncia trà moglie è maritu, a surveglianza pulizzera di u spaziu privatu, l’idea di crimine di pensà punitu di morte, l’arrulamentu di l’operaiu in celebrazioni di Statu durante u so tempu di riposu, i zitelli-sullati…(Wikipédia)

*Distupia: racontu di fizzione chì discrive un mondu utopicu scuru.

U sullatu addurmintatu

In ‘ssu nidu di virdura canta una surgente

Pettina ogni sponda di fili d’argentu

Duve si spechja u sole à millaie di basgi

Fendu di a valle cheta un campu di raggi

Un sullatu, capu nudu, à bocca aperta

U tupezzu postu in u criscione turchinu

Dorme ; sottu à i nuli hè chjinatu in l’erba

Biancu di faccia in u so lettu virdulinu

I pedi in i gladioli hè addurmintatu

Surride cum’è a feria un ciucciu malatu

Mamma natura annannalu chì hà u fretu !

Pocu l’impreme u muscu d’e viole nuvelle

Dorme à a sulana, a so manu in pettu

Chetu. Hà dui tufoni rossi in a pelle.

12/05/2020

D’appressu à Le dormeur du val, di Arthur Rimbaud.

Canzona di e lumache chì vanu à l’interru

À l’interru d’una cuscoglia

Duie lumache si ne vanu

Cunchiglia culor d'ebanu

È crespu nantu à e corne

Si mettenu in strada una sera

D’auturnu stellata è cheta

Ma arrivate sopra à locu

Veranu digià face mottu

E fronde morte, per magia

Una à una sò rinvivite

D’esse ghjunte cusì in ritardu

E lumache sò triste assai

Ma eccu chì u sole

Li dice in sottuvoce

« Fatemi ‘ssu piacè

Pusate una stonda

A vostra biera hè pronta

Solu qualchi seconda

È dopu piglierete

U carru per a villa

Chì parterà stasera

State puru tranquille

Ma ascultate u sole

Ùn ne pigliate dolu

Chì annigrisce u sguardu

Di l’omu addisperatu

È di parlà d’interru

Vi purterà penseru

Mettiteci culori

In tutti i vostri ghjorni. »

È tandu l’animali

L’arburi è e piante

Si mettenu à cantà

Tutti à voce rivolta

A canzona più viva

Quella di l’estatina

È tutt’ognunu beie

Dicendu « à a salute ! »

Cusì bella serata

Una sera d’estate

È e duie lumache

Tornanu in casa soia

Si ne vanu cummosse

Cun tanta gioia adossu

Cum’è anu betu troppu

Viaghjanu in bisbò

Ma veghja da quassù

Annantu à elle a luna.

09/05/2020

D’appressu à « chanson des escargots qui vont à l’enterrement » di Jacques Prévert.

https://www.youtube.com/watch?v=W9Y4InZ7bj8

https://www.lexpress.fr/culture/musique/video-l-emouvante-lecture-par-jean-reno-d-un-poeme-choisi-par-les-filles-de-johnny_1967668.html

Canzona per Marcella

Ùn mi pare cusì luntanu

L’ultima volta ch’o t’aghju vistu

Serà scorsu più d’un veranu

Ma u ricordu ferma vivu.

T’avianu prumessu l’infernu

È si sò persi per istrada

‘ssa prigione culor di pernu

Hè stata a to ultima casa.

Vulianu strughje lu sperà

Chè tù avii in l’avvene

Murendu ai rottu e catene

Cantendu à l’omi « Libertà. »

U mo pientu ùn stancerà

Sì partutu da anni è anni

Mustrenduci ch’ùn hè in vanu

Di lottà per a Libertà.

Altra strada averia vulsutu

Franca di pena è di suffrenza

Ma ùn ci n’hè strade sicure

L’aghju amparata cun u tempu.

Sì cum’è eri mi stai vicinu

Seraghju più forte in caminu

Sia u fanale annantu à a strada

Versu a vittoria bramata.

U mo pientu ùn stancerà

Sì partutu da anni è anni

Mustrenduci ch’ùn hè in vanu

Di lottà per a Libertà…tutti apperlamanu.

07/05/2020

D’appressu à Song for Marcella (Bik McFarlane)

https://www.youtube.com/watch?v=cGKPX67xAwQ

https://www.youtube.com/watch?v=Dg1KpK0UyFY

https://www.youtube.com/watch?v=-0UILYKe0y4

Marcella, nome di a so surella, hè u nome sceltu da Bobby Sands per i so scritti mentre era incarceratu in u H-Block in Long Kesh.

Hè cunsideratu cum’è un eroe di a causa republicana (membru di l’IRA dipoi u 1972) è dinù di a diffesa di a libertà è di i diritti di i prigiuneri pulitichi.

Bobby Sands hè mortu u 05 di maghju di u 1981 dopu à una greva di a fame di 66 ghjorni ch’avia per scopu a ricunniscenza di u statutu di prigiuneru puliticu per ellu è tutti i so fratelli di lotta. Ma Margareth Thatcher, a donna di ferru, ùn hà mai vulsutu sentene parlà dicendu ch’un criminale ferma un criminale, nunda à chì vede cun a pulitica.Per ella Bobby Sands hè mortu solu colpa soia (« he chose to take his own life. »)

A morte di Bobby Sands è quella di nove cumpagni ch'avianu decisu cum'è ellu di pate a fame cambiò per sempre u sguardu di u mondu nantu à l’Irlanda.

Sta canzona « Song for Marcella » hè stata scritta da Brendan « Bik » McFarlane, amicu di Bobby Sands è dinù membru di l’IRA, 10 anni dopu à a so morte.

I bumbò di eri

Pusà nantu à un bancu una stonda cun tè

È guardà a ghjente chì prumena

Discorre di u tempu, andatu o à vene

Stringhjendu a to manuccia in a meia

Eppo dà à manghjà à turturelle manse

Falli appena a paura un istante

Sente nantu à i muri ribumbà a to risa

È guariscemi ogni ferita

Parlatti d’a mo vita i mumenti smariti

I solli in cicculata

Cullane di bumbò

È quelli culuriti à menu di un francu

È i bumbò di tandu.

Viaghjà sottu à l’acqua una stonda cun tè

È fidighja a vita chì ci aspetta

Amparatti a Terra i mo ochji in i toi

Parlà d’u to babbu sì tù voli

Saltichjà in e pozze eppo ricumincià

Ride d’e nostre botte imbruttate

È sente la to risa cum’è si sente u mare

Arrestacci una cria è pensà

Parlatti cum’è funu i mei i Carambar è quelle cunchiglie

U rossu Rùdùdù chì mi tagliava e labbre

È guastava i denti

È i bumbò di tandu.

Pusà nantu à un bancu una stonda cun tè

Guardà u sole chì si ne và

Parlatti di u tempu ch’ùn vulterà mai più

Ditti ch’ùn simu noi i lupi

Ch’eiu sò namurata solu di i to ochji

Chì vanu inseme sempre d'accordu

È sente la to risa vulassi in altu cele

Più altu ch’u cantu di l’acelli

È ditti soprattuttu di amà 'ssa vita

È amalla ancu sì

U tempu hè assassinu

È si porta cun ellu a risa di i zitelli

È i bumbò di eri

È i bumbò di eri.

04/05/2020

D’appressu à Mistral Gagnant (parulle Renaud Séchan)

https://www.youtube.com/watch?v=_YqzuE-5RE8&list=PLjwbNj9NASKNvYvRJruAA_IxAHLdbYVmN&index=13&t=0s&app=desktop

Hè tuttu dettu !

À u telefonu, a voce beruriana cum’è venuta da l’altru mondu :

-« Si tù o Sà ?

-Pensu chì sò eiu…Aspetta aghju da fidighjà in u spechju. Buuh ! Sò eiu sciappatu !!

-Mi n'infuttu chè tù mi macagni, hè u Statu chì paga a cumunicazione.

-Duve ne sì ?

-A neve sinu à u palpatoghju.

-Una campa chè tù abbia trovu ‘ssu telefonu ! Parlami di u tippu.

-Ti chjamu per què ghjustu à puntu.

-Cosa face ?

-U schì…cosa voli ch’ellu fia quì ? N’avia a brama :appena ghjuntu s’hè messu nantu. Ùn l’aghju pussutu seguità cun i mo scarpi di villa è senza schì…di tutte e manere ùn ne sò micca fà !

-Hè tuttu dettu allora.

-Tuttu dettu un cornu ! » dice Béru da i monti alpini « Ùn possu pate a neve, mi dà a picondria, sì tù mi voli crede.

-A sò, dipoi chè tù sì natu, sì contru à u biancu.

-È cosa vole dì què ?

-Nunda o amicu…un cunstatu.

-Ah !

-Contami a t’arrivata.

-Ùn mi ne parlà…una vera spedizione. Certe ingirate ed eiu plattu plattu contru à u vetru di u carru, guardendu in ghjò. O figlioli ! Vidia u viotu sottu, cun case grandi cum’è furmicule. Eppo sguilliscìa ! Mumentu datu mi sò dettu : « à San-Antoniu ùn lu rivideraghju mai più. » U mo vinu caldu di Moutiers mi cullava in bocca.

-Bò...basta cun a puesia ! Dopu ?

-Heu ! Appena pianu..stò statu abbastanza ciambuttatu nò ? Ghjunti quassù facia quasì notte…un nebbione ! Aghju fidighjatu cos’ellu facia l’ambrascu.

-È ?

-Pigliava i so bagagli, i so schì. Dopu hè andatu à l’albergu.

-Qualessu?

-Chì ne sò? Appena più in sù. Ùn aghju pussutu leghje u nome chì c’era troppu neve nantu à l’insegna.

-Dopu ?

-Sò andatu à u meiu, L’Alpes, duve avii avertutu di a mo presenza.

Sò stati bravi. Avia una camera cun vista nantu à u mare.

-Quante scimità chè tù cappii !

-A ti ghjurgu. Ci hè un ritrattu di a Costa Azura in faccia à u mo lettu. Monaco mi pare. Ùn sò micca sicuru. Dumanderaghju.

-Tamant’affare!

-A sò ma ci vole à struìssi in a vita.

-Dopu ?

-A’nstallazione s’hè fatta prestu vistu ch’ùn avia nisun bagagliu. Betu u mo caffè sò andatu à a Posta duve u to mandatu era ghjuntu. Parlendu di Posta ti ringraziu d’avè fattu u pustiglione.

-U pustiglione ?

-Infine…vogliu dì diligenza. Mi sò pigliatu apperlamanu per andà da dunnighjà à l’albergu di Bergeron. Per la miseria un caminu chì cullava ! È torna à Vignale, à viaghjà in a neve cun i mo scarpi lustrati è a so sola in coghju ! T’avertu : in casu ch’avessi da stà appena quì  mi tuccherà à cumprà l’arnesi.

-Compra.

-Ok.Pigliu nota. Bergeron hè surtitu cun dui paghji di schì.

-Dui paghji ?

-Un paghju à i pedi, l’altru nantu à e spalle. Hè corsu ver di un tiraculle ch’elli chjamanu « entre-côte » o « côte-en-pente » ùn la sò più.

-Belle-Côte ?

-Eccu. Tù sì chì sì forte in geugrafia.😎

01/05/2020

D’appressu à La fin des haricots (San-Antonio), pagine 171-72-73-74.

Editions Fleuve Noir (1967)

In memoria di u mo babbu ch'avia una cullezzione d'à pocu pressu una centinaia di San-Antonio💓

.

-