A nascita di a noce di coccò

C'era una volta,in un paese d'a costa uccidentale di l'isula di Negros,un ricchissimu coppiu chì campava cun a so figliola.Cum'ella era figliola sola, li davanu tuttu ciò ch'ella bramava senza mancu ch'ella avessi da dumandà.
In giru à a casa, c'era un ortu piantatu à arburi : aranci, peri, meli, arburetti fiuriti è arburi maiò chì tenianu u locu à l'umbrìa.
Un ghjornu, mentre u babbu è a mamma si cuglianu dui frutti, ghjunse a zitella currioni.Disse à u babbu :
-"O Bà ! Vuleria tastà una noce di coccò.
-Aiò ch'ùn ci n'hè quì !Ùn voli micca nenzu una mela o una pera ?
-Innò ! Dammi una noce di coccò !!!"
U babbu si dumandò in ellu stessu :"a mo moglia averà cultivatu 'ssa noce di coccò senza dimmila ?" è mandò a figliola à vede a mamma.
Quella dinù fù surpresa di sente parlà di noce di coccò: "a mo figliola, ùn avemu micca di 'ssi frutti ma aghju coltu qualchi guiava, eccu per tè..."
A zitella ricusò è si misse à mughjà è à pienghje.
A mamma s'infiarò è stridò : "ch'elle naschinu nantu à tè tutte 'sse noce di coccò !!!"
In u listessu tempu, u ventu si scatinò, u tonu si fece sente è u ghjornu turnò bughju. A zitelluccia smarrì.

U ghjornu dopu, u babbu è a mamma vissenu da a finestra una pianta strana à u locu stessu induve era sparita a chjuca.
Per smenticà a so pena, s'occuponu d'ella cun primura.
A pianta ingrandò è diventò un alburu tamantu chì dava bunissimi frutti.E ghjente chì i manghjavanu dicianu chì a carne era u corpu d'a zitella, u latte e so lacrime è i dui tufoni i so ochji.

Eccu cume hè nata a noce di coccò.



19/12/13

Fola di l'isule Filippine.