Ci sò di i ghjorni ch'omu vuleria spenserati, luntanu da e preoccupazioni cutidiane, da i capatoghji à u travagliu; m'era arrizzata cun sta brama di gode una matinata di pace, appressu tuttu e vacanze sò fatte per quessa. Dopu à u bagnu, capelli sciolti, andai in cucina induve allusingava digià l'odore di u caffè. Nisuna voglia di pane nè di cunfittura, c'eranu i canistrelli fatti da me secondu una sosula di mamma. Per cambià , avia servutu a mo bivenda in una tazzina regalatami da una zia aiaccina, micca tantu per l'affezzione ch'o purtava à ssa zia ma a tazzina, pinta à fiori, purtavava appena d'allegria à ssu sdighjunu di donna sola.
Da induve m'era messa à pusà, vidia a campagna svegliàssi, i merli è i culombi saltichjà in cerca d'un qualcusella da spizzicà.
L'ordinatore, u m'avia lasciatu spentu : Facebook è i mails pudianu aspettà chì ciò chì m'interessava in ssu mumentu precisu era a visione d'u sole chì sparghjia i so raggi, di i fiori chì s'aprianu, di l'erba intinta di guazza è crisciuta miraculi per via di l'acquate di e settimane scorse...
Ùn avia propiu nunda altru da fà, da pensà, solu prufittà di sse stonde di pace prufonda, troppu scarse in u mondu d'oghje, cun i mo canistrelli è u mo caffè.
Un mumentu di felicità tene certe volte à pochi affari.
01/03/14
