T'arricordi ?
Un ghjornu simu diventati amichi...Calati c'eramu nantu à 'ssu bancu verde per sparte u deliziu di quattr'ore, pane è cicculata. M'avia persu una pezza di dece franchi è tù chì passavi m'aiutasti à circàlla.Ùn l'aghju mai ritrova quella pezza ma 'ssu ghjornu precisu aghju vintu qualcosa di più preziosu chè tutta a robba di solli: a to amicizia !
Emu fattu cunniscenza, cun e nostre parulle di zitelli d'ondeci anni. L'ai tale prufessore à u cullegiu ? Quale hè u to nome, a to casata ? Di chì paese sì ?
Aé! Mi dicerete ! È ch'hè turnata ss'amicizia nata nantu à un bancu ghjalatu, cun un filu di ferru spinatu propiu davanti à l'ochji ?
È allora ? Dipoi quandu e circunstenze, u locu induv'ella nasce una persona o un sentimentu averianu da decide di u so avvene ? D'accordu, Jean-Baptiste G., persunagiu principale d'u rumanzu Le Parfum, di Patrick Süskind, natu ch'ellu era nantu à un mercatu, à mezzu à a rumenzula è a puzza di pesciu marciu, hè diventatu un criminale chì tumbava e donne da pigliàlli u so odore ! Casu stremu bella sicura, è fizzione; ma per rivene à 'ssu paragone, a nostra amicizia ùn hà cunnisciutu nè ghjalume nè zingate di spine. Innò !
S'assumiglia à 'ssi fiori veranili. Prufumata è culurita. L'emu annacquata d'un licore chì sà di risa franca, di spartera, di fraiutu, d'anniversarii è di veghje cumune...
Da fàlla ingrandà ! È sò trent'anni oghje !!
24/05/15
